Rama: Qëndroj me Presidentin Biden dhe liderë të tjerë aleatë për të nderuar sakrificën përfundimtare të Alexei Navalny

Kryeministri Edi Rama reagoi sot për vdekjen në burg të kryetarit të opozitës ruse, Alexei Navalny.

“Unë qëndroj me Presidentin Biden dhe liderë të tjerë aleatë për të nderuar sakrificën përfundimtare të Alexei Navalny”, u shpreh Rama në një reagim në rrjetin social X.

“Kjo tragjedi nënvizon rëndësinë e unitetit dhe vendosmërisë aleate. Konferenca e Sigurisë së Mynihut është një moment i përshtatshëm për të theksuar rëndësinë e përpjekjeve kolektive, veçanërisht midis aleatëve të NATO-s”, theksoi Rama.

“Ne të gjithë duhet të ndajmë përgjegjësinë e mbajtjes së parimeve të NATO-s dhe ndërkohë që përballemi me sfida komplekse, ne nuk duhet të hezitojmë të shkojmë më shumë”, shtoi kreu i qeverisë.

“Angazhimi 2 % është kërkesa minimale, jo maksimumi. Shqipëria mbetet e përkushtuar për të bashkëpunuar me partnerët tanë për të forcuar aftësitë tona mbrojtëse, duke përfshirë rigjallërimin e industrisë sonë ushtarake”, nënvizoi Rama.

Opozitari i njohur rus dhe kundërshtari numër 1 i Kremlinit, Alexei Navalny, vdiq të premten në një burg të Arktikut, ku po vuante dënimin me 19 vjet burg, njoftuan shërbimet e burgut, FSIN.

Fraksion.com