Rusi, politikanit i refuzohet kandidatura për zgjedhjet presidenciale

Politikani rus Boris Nadezhdin, i cili ka kundërshtuar luftën ndaj Ukrainës, nuk u lejua që të kandidonte për zgjedhjet presidenciale të muajit të ardhshëm.

Vendimi i Komisionit Qendror të Zgjedhjeve lehtëson mundësitë që Presidenti Vladimir Putin të fitojë mandatin e pestë në pushtet.

Boris Nadezhin-it i nevojiteshin 100 mijë firma për të garuar si kandidat për president, një detyrim ligjor për kandidatët e partive politike që nuk janë pjesë e Parlamentit.

Komisioni Qendror i Zgjedhjeve deklaroi se 9000 firma ishin të pavlefshme, çka i hoqi atij mundësinë që të kualifikohej për të marrë pjesë në zgjedhje.

60 vjeçari ka bërë publikisht thirrje për të ndërprerë luftën ndaj Ukrainës dhe për nisjen e dialogut me Perëndimin. Mijëra rusë në mbarë vendin muajin e kaluar firmosën për të mbështetur kandidimin e tij, një akt i pazakontë i mbështetjes së opozitës në një terren politik që kontrollohet plotësisht nga Kremlini.

Zoti Nadezhin i kërkoi Komisionit Qendror të Zgjedhjeve që ta shtynte vendimarrjen, por ai refuzoi. Ai tha se do të apelonte vendimin./voa

Fraksion.com