Kompanitë gjermane në Kinë: Pragmatizëm dhe jo eufori

“Kina ende është një vend interesant, edhe nëse nuk është aq i lehtë sa më parë. Pavarësisht nga gjithçka, ia vlen të jesh në Kinë,” përmbledh Ulf Reinhardt. Në një intervistë për DW, presidenti i Dhomës Gjermane të Tregtisë në Kinë përpiqet të mbetet optimist, edhe pse biznesi nuk është bërë më i lehtë për kompanitë gjermane në perandorinë e Xi Jinping-ut gjatë pesë viteve të fundit.

Rritja e konkurrencës nga kompanitë kineze, qasja e pabarabartë në treg, dobësimi i ekonomisë dhe tensionet gjeopolitike po tensionojnë kompanitë gjermane dhe të huaja në Republikën Popullore. “Viti i kaluar ishte një test realiteti për kompanitë gjermane në Kinë,” thekson Reinhardt.

Treguesi kryesor i klimës së biznesit

Që nga viti 2007, kompanitë gjermane janë anketuar rregullisht nga Dhoma Gjermane e Tregtisë në lidhje me pritjet e tyre për biznesin në Kinë. Këtë herë, 566 kompani anëtare morën pjesë në sondazh nga data 5 shtator deri më 6 tetor 2023. Studimi konsiderohet si një nga anketat më përfaqësuese të klimës së kompanive gjermane në Kinë.

Aktualisht, 91% e kompanive gjermane në Republikën Popullore duan t’i qëndrojnë besnike Kinës. Kjo ndodh pavarësisht se 83 për qind e kompanive të anketuara besojnë se ekonomia kineze po humbet fuqi. Por edhe pse pamja e përgjithshme e ekonomisë kineze është errësuar, ende është e mundur të fitosh para në Kinë. Dhe biznesmenët gjermanë po përpiqen t’u përgjigjen rreziqeve në rritje me menaxhimin e duhur të krizës.

Pavarësisht rrethanës së ngadalësimit të ekonomisë: 79% e biznesmenëve gjermanë presin rritje të vazhdueshme në industrinë e tyre gjatë pesë viteve të ardhshme dhe 54% planifikojnë të vazhdojnë të investojnë.

Një pengesë qendrore për kompanitë gjermane janë rregullat e reja ligjore, të cilat shpesh bien papritur mbi kompanitë e huaja. “Kuadri ligjor në Kinë dobëson konkurrencën e kompanive gjermane që janë të vendosura të përfitojnë nga fuqia inovative e Kinës,” thotë Reinhardt.

Pasiguri në lidhje me transferimin e të dhënave

Ligji i diskutueshëm i Kinës kundër spiunazhit është gjithashtu një burim pasigurie. “Bizneset nuk e pëlqejnë pasigurinë e asnjë lloji. Një nga sfidat me të cilat përballemi është se ligjet dhe rregulloret e miratuara në Kinë shpesh janë të formuluara shumë të paqarta. Ato lënë shumë hapësirë për “interpretim dhe në këtë mënyrë komplikojnë vendimmarrjen”, shpjegon Reinhardt në intervistën për DW.

Sipas kreut të dhomës gjermane, paqartësitë në lidhje metransferimin e të dhënave janë një shembull për këtë pasiguri: “Cilat të dhëna mund të transferohen jashtë vendit, kur dhe si?”

Konkurrencë më e fortë kineze

Rezultatet aktuale të sondazhit pasqyrojnë gjithashtu faktin se presioni i konkurrencës është rritur ndjeshëm vitet e fundit. Pesë përqind e kompanive të anketuara besojnë se konkurrentët kinezë janë tashmë liderë të inovacionit në sektorin e tyre. 46% presin që kjo të ndodhë në pesë vitet e ardhshme. Në industrinë e automobilëve, njëmbëdhjetë përqind e kompanive tashmë i shohin konkurrentët e tyre kinezë si liderë të inovacionit. Mbi gjysma e pjesëmarrësve në sondazh presin që kjo të ndodhë në pesë vitet e ardhshme.

Përballë konkurrencës në rritje nga Kina, Dhoma Gjermane e Tregtisë në Kinë po u bën thirrje udhëheqësve të shtetit dhe partive në Pekin që të krijojnë një fushë loje të barabartë për të gjithë. “Shumica e kompanive kineze kanë pak arsye për të frikësuar konkurrencën,” thotë Reinhardt. Megjithatë, kushtet korrekte të konkurrencës do të bënin të mundur rritjen e produktivitetit dhe inovacionit në të gjithë sektorët, thekson kreu i dhomës.

Sipas tij, sigurisht që ka përparime, por ka ende vend për përmirësim. “Qeveria ka marrë shumë masa që kontribuojnë në barazimin e fushës së lojës. Ne shohim  përparim dhe dëshirojmë të inkurajojmë autoritetet kineze të bëjnë më shumë.”

“Për sa u përket parashikimeve afatshkurtra, ne ende nuk e kemi kaluar lumin,” përfundon Reinhardt. Rreziqet gjeopolitike u janë shtuar pasojave ekonomike të pandemisë COVID dhe krizës në sektorin kinez të pasurive të paluajtshme. “Në plan afatshkurtër, ekziston rreziku i deflacionit dhe kemi krizën e Detit të Kuq,” rendit Reinhardt faktorët e presionit. Por në plan afatmesëm, anëtarët e Dhomës Gjermane të Tregtisë besojnë në rritje më të madhe. Reinhardt pret në tre deri në pesë vitet e ardhshme periudha më të mira. “Kur të kthehemi në modelet normale të rritjes , siç i kemi pasur”.