“E hëna blu”, sot është dita më e trishtuar e vitit

Por çfarë do të thotë kjo?

Sipas teorisë së shkencëtarëve nga Britania e Madhe, ndjenjat janë të zymta pas festave të Krishtlindjeve, për shkak të problemeve financiare.

Me shpenzimet e shtuara të festave të fundvitit që na kanë lënë një boshllëk edhe në xhepa që kombinohet me natën e gjatë dhe motit gri, nuk bën aspak habi fakti, që kjo e hënë të jetë dita më e trishtueshme e vitit.

Por cila është historia e të Hënës blu? Nëse kthehemi në 2005-ën, Sky Travel, përdori një ekuacion në përpjekje për të përllogaritur se cila ishte dita më e trishtuar e vitit, duke përdorur elementë të tillë si moti, niveli i borxheve, koha e kaluar nga festat dhe motivimi. Dhe data që rezultoi ishte e hëna e tretë e janarit, që këtë vit ra më 17 janar.

Por ndërkohë, edhe psikologët shtojnë ndonjë argument. Janari mund të jetë një kohë depresive për shumëkënd pasi historikisht regjistrohet rritje e numrit të divorceve apo njerëzve që braktisin punën. Në anën tjetër, ekspertët ofrojnë edhe këshilla se si mund të bëhet e hëna blu, më pak e trishtueshme. Mes tyre, pak stërvitje, shëtitje në natyrë, takime me miq e familjarë, etj.

Fraksion.com