Rama mbledh qeverinë në Lezhë
Kryeministri Edi Rama ka mbledhur në një takim dy ditor kabinetin qeveritar në Shëngjin të Lezhës.
Përveç ministrave, në këtë takim janë të pranishëm edhe sekretari i Përgjithshëm i PS, Blendi Klosi, kreu i grupit parlamentar, Bledi Çuçi, si edhe krerët e komisioneve parlamentare, zv/ministrat, drejtuesit politikë të qarqeve dhe kryeparlamentarja Lindita Nikolla.
Axhenda nis me një fjalë të kryeministrit Edi Rama dhe më pas Sekretari i Përgjithshëm i PS dhe kryetari i grupit parlamentar do të diskutojnë mbi problematikat e punës në parlament.
Pjesa e dytë e axhendës do të fokusohet te administrata, ku do të përfshihen rezultatet dhe sondazhet për burimet njerëzore.
Më pas, deri në orën 19:00 të pasdites, debati do të përqendrohet në katër blloqet e qeverisjes mbi problematikat e trashëguara të 2023, objektivat e 2024 dhe ndarja e kompetencave të zëvendësministrave për t’u deleguar nga ministrat menjëherë pas ‘retreat’-it.
Ndërsa dita e dytë e axhendës, do të ketë në fokus raportimet nga secili ministër për të bërë një analizë të thelluar të punës së tyre.
Fraksion.com
