Pranga 2 personave për dhunë seksuale, Balla: Mbrojtje dhe ri-integrim për viktimat
Ministri i Brendshëm Taulant Balla, në një reagim në rrjetet sociale, thekson se Policia e Shtetit duhet të rriti vigjilencën për të parandaluar dhunën në çdo formë të saj, teksa bën thirrje për mbrojtje dhe ri-integrim të viktimave të dhunës seksuale.
Ministri Balla reagoi pas njoftimit nga Policia e Beratit për arrestimin e dy personave, të cilët akuzohen nga Prokuroria se kanë kryer marrëdhënie seksuale me dhunë.
“Policia e Shtetit në Berat ka arrestuar në bashkëpunim me Prokurorinë dy persona të dyshuar për marrëdhënie seksuale me dhunë, ndërsa njëra prej viktimave është e mitur”, shkruan Balla.
“Do bëjmë gjithçka që viktimat e dhunës seksuale dhe me bazë gjinore të mbrohen dhe trajtohen me dinjitet e respekt. Është detyra jonë, është detyra e Policisë së Shtetit të rrisim vigjilencën dhe ta adresojmë me vendosmëri dhunën në të gjitha format e saj dhe të marrim masat për të parandaluar dhunën ndaj vajzave, grave, për të mbrojtur viktimat dhe për t’i ndjekur penalisht autorët e krimit. Viktimat e dhunës nuk duhen stigmatizuar, por duhet t’ju ofrojmë mbrojtje, mbështetje dhe ri-integrim të plotë në punë dhe shoqëri”, thekson Balla.
