NATO po monitoron nga afër situatën në Lindjen e Mesme, Stoltenberg: Irani dhe Hezbollahu nuk duhet të përfitojnë nga konflikti
Aleatët e NATO-s trajtojnë situatën në Lindjen e Mesme me Mbretin e Jordanisë
Sekretari i Përgjithshëm Jens Stoltenberg mirëpriti Madhërinë e Tij Mbretin Abdullah II ibn Al Husein të Mbretërisë Hashemite të Jordanisë në selinë e NATO-s (6 nëntor 2023) për bisedime mbi partneritetin e Aleancës me Amanin dhe sfidat e sigurisë rajonale. Madhëria e tij mori pjesë në një takim të Këshillit të Atlantikut të Veriut, duke trajtuar sfidat e sigurisë me të cilat përballet Lindja e Mesme dhe Afrika e Veriut, duke përfshirë konfliktin në Gaza.
Sekretari i Përgjithshëm vlerësoi rolin e Jordanisë në promovimin e sigurisë rajonale dhe tha se vizita thekson thellimin e partneritetit midis NATO-s dhe Jordanisë. Stoltenberg mirëpriti që aleatët e NATO-s po vazhdojnë të zbatojnë paketën e ndërtimit të kapaciteteve të mbrojtjes për Jordaninë, duke përfshirë mbështetjen për kundër-terrorizmin, sigurinë kibernetike dhe menaxhimin e krizave.
“NATO po monitoron nga afër situatën në Lindjen e Mesme. Jemi thellësisht të shqetësuar për situatën në dhe rreth Gazës. Izraeli ka të drejtë të mbrohet, në të njëjtën kohë, mbrojtja e civilëve është thelbësore dhe unë mirëpres përpjekjet për të siguruar që ndihma humanitare të arrijë në Gaza”, tha Stoltenberg. “Irani dhe Hezbollahu nuk duhet të përfitojnë nga konflikti. Është e rëndësishme që kjo situatë të mos përshkallëzohet më tej”, shtoi ai.
Jordania iu bashkua forumit të partneritetit të Dialogut Mesdhetar të NATO-s në 1995 dhe është një nga partnerët më të ngushtë të NATO-s në rajon. “NATO vlerëson shumë partneritetin e saj me Jordaninë dhe falënderoj mbretin Abdullah për udhëheqjen e tij personale në këtë moment kritik. Sot ne kemi nevojë për dialog më shumë se kurrë. NATO është plotësisht e përkushtuar për të mbështetur partnerët tanë në rajon, përfshirë përmes Dialogut Mesdhetar, për të kontribuar në stabilitetin dhe sigurinë në Lindjen e Mesme dhe Afrikën e Veriut”, tha Stoltenberg.
Fraksion.com
