Sulmet kundër hebrenjve në aeroportin e Dagestanit

20 persona u plagosën në trazirat anti-hebreje në Mahaçkala në republikën ruse të Dagestanit. Kohët e fundit, ka pasur gjithnjë e më shumë incidente antisemite në Kaukazin e Veriut, ku jeton shumica e popullsisë myslimane.

Për shkak të luftës në Lindjen e Mesme, ka gjithnjë e më shumë sulme kundër hebrenjve në pjesën ruse të Kaukazit të Veriut, ku myslimanët përbëjnë shumicën e popullsisë. Në Mahaçkala në Republikën e Dagestanit të dielën në mbrëmje, një turmë njerëzish hynë me forcë në disa pjesë të aeroportit të mbyllura për pasagjerët, sepse atje u ul një aeroplan nga Tel Avivi, gjoja me refugjatë nga Izraeli. Shumë njerëz arritën madje të dilnin në pistë.

Më shumë se 20 persona, civilë dhe policë u plagosën në incident, njoftoi agjencia shtetërore ruse e lajmeve Tass, duke cituar Ministrinë e Shëndetësisë. Dhjetë persona kanë kërkuar ndihmën e mjekut në spital, dy prej tyre janë në gjendje kritike.

Aeroporti është mbyllur përkohësisht dhe avionët janë drejtuar në aeroporte të tjera, njoftoi agjencia shtetërore e rregullimit të aviacionit Rosavia Tass. Agjencia më vonë njoftoi se forcat e sigurisë kishin rivendosur kontrollin mbi të gjithë aeroportin, por ai do të qëndronte ende i mbyllur deri më 6 nëntor. Sipas Ministrisë së Punëve të Brendshme ruse, 60 persona janë arrestuar.

Grafitet ekstremiste

Të shtunën, një turmë njerëzish rrethuan një hotel në qytetin Khasavjort në Dagestan për shkak të thashethemeve se atje po qëndronin refugjatë nga Izraeli. Agjencia shtetërore Rio e konfirmoi këtë incident. Sipas raporteve lokale, disa dhjetëra burra hynë në hotel për të kontrolluar pasaportat e mysafirëve të hotelit. Më pas policia bllokoi të gjitha hyrjet në hotel.

Situata u përkeqësua edhe më shumë nga fakti se fluturimet me qytetarë rusë që evakuohen nga Izraeli zbarkojnë në aeroportet e qyteteve në Kaukazin e Veriut me shumicë myslimane, domethënë në aeroportet e Mahaçkala, Mineralnye Vody dhe Soçi.

Në qytetin e Nalçikut, gjithashtu në këtë zonë, të dielën u dogjën goma pranë ndërtesës së qendrës kulturore hebraike. Sipas policisë së Republikës së Kabardino-Balkaria, ndërtesa ishte e mbuluar me slogane ekstremiste dhe antisemite.

Reagimi i presidentit

Në republikën e Karachayevo-Cherkessia, protestuesit kërkuan dëbimin e popullatës lokale hebreje. Nga ana tjetër, presidenti i Dagestanit, Sergej Melikov, i bëri thirrje popullatës që të mos dorëzohet para nxitjes së ekstremistëve që duan të destabilizojnë situatën. “Për shkak të lajmeve të rreme të përhapura nga armiqtë tanë, disa të rinj ishin në prag të shkeljes së ligjit”, ka shkruar ai në Telegram.

Imamët islamikë në rajon gjithashtu u pozicionuan qartë: “Antisemitizmi nuk ka vend në Kaukazin e Veriut multietnik,” njoftuan ata. Për shkak të dhunës në Lindjen e Mesme, presidenti rus Vladimir Putin u takua javën e kaluar me krerët e feve në Rusi. Me atë rast ai bëri thirrje për bashkëjetesë paqësore të popujve dhe feve në vend.

SHBA dhe Izraeli dënojnë protestat

Këshilli i Sigurisë Kombëtare i SHBA-së dënoi “protestat antisemite” në Dagestan. “SHBA qëndron me të gjithë komunitetin hebre përballë rritjes globale të antisemitizmit. Nuk ka kurrë një justifikim për antisemitizmin”, shkroi zëdhënësja Adrienne Watson në Platformën X.

Izraeli më parë ka bërë thirrje për mbrojtjen e qytetarëve të tij: “Ne presim që autoritetet ruse të garantojnë sigurinë e të gjithë qytetarëve izraelitë dhe hebrenjve në përgjithësi, dhe të ndërmarrin veprime vendimtare kundër rebelëve, si dhe nxitësve kundër hebrenjve dhe izraelitëve”, thuhet në një deklaratë të përbashkët nga zyra e kryeministrit izraelit Benjamin Netanyahu dhe ministria e Punëve të Jashtme./DW