Izraeli i kërkon dorëheqjen Guterres për deklaratat për Hamasin

Zyrtarë të lartë izraelitë i kërkuan dorëheqjen sekretarit të përgjithshëm të OKB-së, Antonio Guterres pas deklaratave të tij, sipas të cilave ”sulmet terroriste të kryera nga Hamasi nuk erdhën nga asgjëja”.

”Deklarata e Guterres në Këshillin e Sigurimit të OKB-së se aktet e Hamasit duhet të shihen në kontekstin e dekadave të shtypjes së palestinezëve nga izraelitët ishte një shpifje e pastër”, tha Gilad Erdan, ambasadori izraelit në OKB.

Ai tha se shefi i OKB-së nuk kujdesej për vuajtjet e civilëve izraelitë dhe po përpiqej të justifikonte terrorizmin.

“Unë mendoj se sekretari i përgjithshëm duhet të japë dorëheqjen”, tha Erdan në Nju Jork.

Ministri i Jashtëm izraelit Eli Cohen, i cili mori pjesë në debatin e këshillit, më vonë anuloi një takim të planifikuar me Guterres.

“Unë nuk do të takohem me sekretarin e përgjithshëm të OKB-së. Pas 7 tetorit nuk ka vend për një qasje të ekuilibruar. Hamasi duhet të fshihet nga faqja e dheut”, shkroi Cohen në rrjetet sociale.

Guterres kishte kritikuar bombardimet e pamëshirshme të Izraelit në Rripin e Gazës dhe foli për “shkelje të qarta të ligjit ndërkombëtar humanitar” dhe “dënim kolektiv”.

Ai dënoi sulmin terrorist të Hamasit më 7 tetor, i cili la më shumë se 1 400 të vdekur dhe rreth 220 të tjerë të mbajtur peng, por tha se krimet nuk kishin ndodhur “në vakum”.

“Populli palestinez i është nënshtruar pushtimit mbytës prej 56 vitesh”, tha Guterres.

“Ata e kanë parë tokën e tyre të gllabëruar vazhdimisht nga vendbanimet dhe të rrënuar nga dhuna… Shpresat e tyre për një zgjidhje politike të gjendjes së tyre janë zhdukur… Ankesat e popullit palestinez nuk mund të justifikojnë sulmet e tmerrshme të Hamasit. Dhe ato sulme të tmerrshme nuk mund të justifikojnë ndëshkimin kolektiv të popullit palestinez”, tha Guterres.

Duke folur në Këshillin e Sigurimit, ministri i Jashtëm i Izraelit refuzoi me forcë thirrjet për një armëpushim në Rripin e Gazës, ku Ministria e Shëndetësisë e drejtuar nga Hamasi tha se numri i të vdekurve kishte arritur në 5 791.

Cohen pyeti këshillin se cila duhet të jetë “përgjigjja proporcionale” për vrasjen e foshnjave, përdhunimin e grave dhe prerjen e kokës së viktimave.

Cohen kishte fotografi të personave që mbaheshin peng në Gaza.

“Si mund të pajtohesh për një armëpushim me dikë që është betuar të vrasë dhe shkatërrojë ekzistencën tënde?”, deklaroi ai me zë të lartë duke e quajtur Hamasin “nazizmi i ri”.

Sipas burimeve diplomatike, disa delegacione arabe u larguan nga dhoma gjatë fjalimit të Cohen, përfshirë ato nga Algjeria dhe Libia.

Përfaqësuesit nga Jordania, Egjipti, Arabia Saudite dhe Emiratet e Bashkuara Arabe, megjithatë, nuk u larguan.

Ministri i Jashtëm palestinez, Riyad al-Maliki akuzoi Këshillin e Sigurimit për mosveprim përballë përshkallëzimit të dhunës.

“A nuk është detyrë e Këshillit të Sigurimit të ruajë paqen dhe sigurinë ndërkombëtare dhe të mbështesë parimet dhe objektivat e Kartës së OKB-së të garantuara për popujt tanë?” pyeti al-Maliki.

Al-Maliki kritikoi këshillin, duke thënë se ai kishte standarde të dyfishta kur bëhej fjalë për izraelitët dhe palestinezët.

Sekretari amerikan i Shtetit, Antony Blinken vuri në dukje se qytetarët e më shumë se 30 vendeve anëtare të OKB-së kishin vdekur në sulmet e 7 tetorit.

“Secili prej nesh ka një interes, secili prej nesh një përgjegjësi në mposhtjen e terrorizmit”, tha ai në Këshillin e Sigurimit.

Ai tha se Izraeli ka “të drejtën dhe detyrimin” për të mbrojtur veten, por se “mënyra se si e bën këtë ka rëndësi”.

“Civilët palestinezë duhet të mbrohen. Kjo do të thotë që Hamasi duhet të ndalojë përdorimin e tyre si mburoja njerëzore…dhe kjo do të thotë që Izraeli duhet të marrë të gjitha masat e mundshme për të shmangur dëmtimin e civilëve”, tha ai.

Ministrja e Jashtme gjermane, Annalena Baerbock gjithashtu theksoi të drejtën e Izraelit për vetëmbrojtje – por i kërkoi vendit që të zhvillojë luftën e tij “brenda kornizës së ligjit ndërkombëtar”.

“Unë ju flas si ministre e Jashtme i një vendi që mban përgjegjësi historike për krimin më të keq që mund të imagjinohet, krimin e kryer nga Gjermania naziste… Kurrë më, për mua si gjermane, kjo do të thotë se ne nuk do të pushojmë duke ditur se nipërit e të mbijetuarve të Holokaustit tani po mbahen peng nga terroristët në Gaza. Për Gjermaninë, siguria e Izraelit është e panegociueshme”, tha Baerbock.

 

Fraksion.com