“Na kanë votuar të bëjmë opozitë”, Zhupa “e ngujuar” në Kuvend: PS e ka kthyer parlamentin në paradhomë të Ramës
Seanca e pazakontë në Kuvendin e kësaj të enjteje përfundoi me përjashtimin për 10 ditë të 26 deputetëve të Foltores të cilët bllokuan vendin Nikollës, penguan ministrat të uleshin në vendet e tyre si dhe u hoqën kartat kolegëve të tyre deputetë për të votuar. Gjithë ky kaos u iniciua nga grupi i Berishës dhe Bardhit të cilët pretendojnë se vetëm në këtë lloj formë Kuvendi zhvillon seanca plenare normale. E ftuar në Report Tv, ishte edhe deputetja Ina Zhupa, emri i së cilës ishte në listën e deputetëve të përjashtuar.
Në një intervistë në Sot Live në Shqipëri / Report Tv, Zhupa tregoi sesi marrin vendimet socialistët duke votuar në fletë të bardhë pa ditur se për çfarë po votojnë dhe sesi e kanë kthyer parlamentin në paradhomë të kryeministrit. Sipas saj, Kuvendi është kthyer në një instrument që kontrollohet nga Rama.
“PD i qëndron dhe do i qëndrojë kësaj pavarësisht çfarë mendon PS dhe çfarë mekanizmash dhe abuzimesh me pushtetin përdor ajo.
Neve jemi në Parlament, por këtu e keni parë sesi seancën e kaluar Nikolla kaloi në formë antikushtetuese rrëzimin e propozimeve tona për komisione hetimore. Po çfarë të bëjmë ne? Të rrimë si fasadë? S’kemi bojkot, kemi qenë në të gjitha komisionet, ishim sot për të ndaluar fasadën e parlamentit, paradhomën e Ramës. E dini që sot në u firmosën në një fletë të bardhë pa ditur se për çfarë e më pas morën vendimin për përjashtimin e deputetëve të përjashtuar. Këto përjashtime me urdhër të Ramës, me urdhër politik për të boshatisur sallën e Kuvendit, është në fakt mundësia më e madhe për shqiptarët sesa kanë frikë nga opozita e vërtetë.
Firmat e deputetëve socialistë të firmosura në një fletë të bardhë dhe ne psh mund të shkruajmë çdo gjë kështu, dhe ja dorëzonin kështu Felajt që të vendoste ajo çfarë vendimi do merrej. Këta janë thjesht ‘yes man’ që bëjnë se çfarë u thotë Edi Rama.”, tha Zhupa.
Deputetja u shpreh se kjo sjellje nga deputetët e opozitës do të vijojë.
“Populli dhe shqiptarët na kanë votuar të bëjmë opozitë, të zbatojmë kushtetutën kërkon njeri të bëjmë fasadë dhe të rrimë urtë e të dëgjojmë. Është në detyrën tonë ta kthejmë në normalitet këtë sallë parlamenti. Atë që na jep kushtetuta nuk mund të na i heqë Rama dhe deputetët yes man të tij. Ne do të marrim çdo vendim që parlamentarizmi t’i kthehet normalitetit të respektojë të drejtat e opozitës. Dje psh janë rrëzuar 6 propozime tonat. Për të kuptuar se në çfarë situatë ndodhet parlamentarizmi sot. Interpelanca s’bëjmë dot ndërkohë që shkelen të drejtat kushtetuese për të marrë nën shqyrtim propozimet tona.”, tha Zhupa.
Fraksion.com
