Sërish Seferi dhe Shqipëri – Çeki 3 me 0

Shqipëria 3:0 Çekia

Shqipëria sfidon Çekinë në “Air Albania” (20.45), në ndeshjen e vlefshme për kualifikueset Euro 2024. Kuqezinjtë vijnë në këtë takim me mungesa të rëndësishme në mbrojtje, ku për shkak dëmtimesh nuk janë në dispozicion Ismajli dhe Kumbulla. Në sulm, pritej që të paktën ta niste nga stoli Armando Broja, por sulmuesi kuqezi nuk ia ka dalë të jetë në 100% në formë për këtë sfidë, me teknikun që lajmëroi dje se Broja s’do luajë. Në krahun tjetër, kundërshtarët vuajnë mungesë e sulmuesit Patrick Schick.

Pak më parë janë publikuar edhe titullarët, me trajnerin Sylvinho dhe homologun Sylhavi që kanë shuar të gjitha dyshimet për lojtarët që e nisin nga minuta e parë.

Sa i takon rreshtimit kuqezi, përpara portierit Berisha është vendosur Mitaj, Gjimshiti, Ajeti dhe Hysaj. Mesfusha përbëhet nga Ramadani dhe Asllani. Cikalleshi është në majë të sulmit, me sulmuesin që do ketë ndihmën e Seferit dhe Asanit nga krahët. Pas Cikalleshit, qëndron Bajrami.

Shqipëria kryeson grupin me 10 pikë, 2 pikë më shumë se Çekia. Në lojë për një biletë në Europian është edhe Moldavia e vendit të 3-të me 8 pikë, ndërsa fije të vogla shprese ka edhe Polonia e vendit të katërt me vetëm 6 pikë.

Formacioni zyrtar:

Shqipëria: Berisha, Mitaj, Ajeti, Gjimshiti, Hysaj, Ramadani, Asllani, Bajrami, Asani, Seferi, Cikalleshi. Trajner: Sylvinho

Çekia: Pavlenka, Krejci, Brabec, Holes, Coufal, Soucek, Sadilek, Jurasek, Cerny, Kuchta, Chytil

Minutë pas minute:

73- Gol. Seferi thellon shifrat, falë një kundërsulmi. Lojë fëmijësh për të “tundur rrjetën”.

51- Gool Seferi. Sulmuesi gjen golin e sigurisë. Konfirmohet edhe nga VAR!

45- Mbyllet fraksioni.

37- Realizon gol Çekia, por goli anulohet për prekje me dorë. Karton i kuq për Mojmir Chytil, më saktë i dyti i verdhë.

21- Jasir Asani ndalet vetëm në fund. Tjetër mundësi, Shqipëri e shpejtë!

8- Asani gol. Tjetër perlë e Jasirit, goli i 3-të në 6 ndeshje. Feston me plis!

6- Një krosim i bukur drejt Mojmir Chytil, i cili provon me kokë! Pa rezultat.

4- Shqipëria del përpara me Mitaj-Bajrami! Kuptojnë aksionin çekët.

2- Çekia e fillon në sulm. Berisha e ka në kontroll topin, pas një gjuajtje nga distanca të rivalëve.

1- Nis ndeshja.

Shënime:

20:45 ; Arbitri Makkelie sinjalizon fillimin e takimit.

20:43 ; Emocione, ekzekutohet himni kombëtar. Të gjithë në këmbë!

20:40 ; Gati gjithçka, pozicionohen lojtarët dhe arbitri për himnet respektive.

20:20 ; Atmosfera fantastike, tifozët marrin vendet e tyre përkatëse.