Izraeli thotë se 300,000 rezervistë u thirrën për të luftuar

Izraeli ka thirrur 300,000 rezervistë për të luftuar për ushtrinë e tij, tha të mërkurën për CNN zëdhënësi i Forcave të Mbrojtjes të Izraelit (IDF), Majori Doron Spielman.

“Nuk ka familje që nuk ka dikë që të jetë thirrur. Ose për fat të keq, meqenëse ne jemi një vend kaq i vogël, një familje që nuk ka miq, apo të dashur që ende mungojnë”, tha Spielman për CNN.
Spielman vuri në dukje raportet që tregojnë se mobilizimi në Izrael, i cili ka një popullsi prej rreth 9.2 milion njerëz, ishte në “shkallën e një vendi të madh” si Shtetet e Bashkuara.

Ai përsëriti vërejtjet e bëra nga shefi i shtabit të IDF-së, Herzi Halevi, duke theksuar se Izraeli po “përgatitet për çdo skenar” ndërsa vazhdon të grumbullojë forcat tokësore përgjatë kufirit të tij jugor.

Spielman dha gjithashtu një përditësim mbi situatën me pengjet e marra nga Hamasi, duke i thënë CNN se dy gjeneralë kryesorë janë caktuar për t’u marrë me këtë çështje në një nivel operacional.

Luftëtarët e Hamasit po mbajnë peng rreth 150 persona në vende në të gjithë Gazën, tha të hënën ambasadori i Izraelit në Shtetet e Bashkuara. Hamasi tha se do të fillonte ekzekutimin e pengjeve civile nëse Izraeli synonte njerëzit në Gaza pa paralajmërim.

“Natyrisht, situata më e mirë do të ishte nëse Hamasi do t’i lironte ata pengje dhe do t’i kthente te të dashurit e tyre që presin këtu në Izrael. Për ne, kjo na vendos në një situatë tepër të vështirë,” tha Spielman, duke shtuar se IDF mbetet e bindur se “aftësitë ushtarake të Hamasit duhet të eliminohen plotësisht”.

Fraksion.com