The Guardian: Sulmi në Veri skenari i Serbisë për ndarjen e Kosovës!
Kosova ka akuzuar Serbinë se qëndron pas një grupi paraushtarak që i zuri pritë një patrulle policie dhe u përlesh me forcat kosovare të dielën.
Autoritetet në Prishtinë shfaqën një sërë armatimesh moderne që ata thanë se grupi po përdorte, duke përfshirë dy makina të blinduara të prodhimit serb dhe një granatëhedhës, së bashku me një dokument që supozohej se tregonte se granatahedhësi, i bërë nga kompania e armëve Zastava, ishte furnizuar nga ushtria serbe, citon The Guardian.
Qeveria e Kosovës pretendoi gjithashtu se lideri i grupit ishte një politikan i shquar serb besnik ndaj Aleksandër Vuçiç dhe se një nga tre luftëtarët paraushtarakë të vrarë të dielën ishte një ish-truproje e Aleksandër Vulin, shefit të inteligjencës serbe i sanksionuar nga SHBA në korrik për korrupsion.
“Ky grup ka ardhur nga Serbia, ata janë të trajnuar në Serbi, të financuar nga ata dhe gjithashtu të pajisur nga ushtria e Serbisë dhe policia e saj. Një pjesë e armëve janë marrë nga magazinat e ushtrisë dhe janë dorëzuar te terroristët që kanë ardhur në Kosovë nga Serbia”, tha për Guardian Xhelal Sveçla, ministri i Brendshëm i Kosovës.
Sveçla tha se ministria e tij kishte ndarë provat me ambasadat dhe agjencitë perëndimore.
“Ajo që ata donin të bënin është të kapnin territorin e Kosovës dhe të hapnin një kanal të ri komunikimi, një rrugë të re nga Serbia në Kosovë”, tha ai, duke shtuar se qëllimi përfundimtar ishte ndarja e vendit.
Qeveria serbe ka mohuar përfshirjen me grupin e armatosur, si dhe ka mbajtur ditë zyrtare zie për tre të vdekurit. Vuçiç ka kërkuar të justifikojë veprimet e tyre duke pretenduar rrejshëm, në një takim me ambasadorin rus në Beograd se qeveria e Kosovës po kryente spastrim etnik. Kosova pretendon se grupi drejtohej nga Milan Radoiçiç, nënkryetari i partisë Lista Serbe, e cila dominon politikën në katër komunat me shumicë serbe në veri të Kosovës. Sveçla tha se shërbimi i inteligjencës së vendit të tij besonte se Radoiçiç i cili është sanksionuar nga SHBA dhe Britania e Madhe, ishte plagosur dhe po shërohej në spitalin kryesor ushtarak në Beograd.
Pretendimi nuk mund të verifikohej në mënyrë të pavarur. Përplasja ndodhi në një kohë kur bisedimet e ndërmjetësuara nga BE-ja që synojnë normalizimin e marrëdhënieve midis dy vendeve kanë ngecur, me Vuçiçin që u zotua se nuk do ta njohë kurrë Kosovën dhe qeveria e Kosovës si pasojë refuzon të krijojë një asociacion gjysmë autonom të komunave serbe. SHBA-ja i ka mbështetur bisedimet dhe deri më tani ka mbajtur anën e Evropës, që fajëson kryeministrin Albin Kurti për dështimin e negociatave. Por administrata Biden po heton përfshirjen e Beogradit në njësinë paraushtarake dhe po përpiqet të zbulojë misionin e saj.
Nëse Vuçiç zbulohet se ka qenë i përfshirë, kjo mund të ndryshojë qasjen e ndërmarrë nga SHBA dhe BE ndaj negociatave, të cilat janë kritikuar nga ligjvënësit në të dy anët e Atlantikut si të njëanshme ndaj Beogradit. Kjo gjithashtu mund të çojë në sanksione ndaj Serbisë.
“Është gjithnjë e më e qartë se ka pasur një skenar për të provokuar një konflikt në mënyrë që ushtria serbe pastaj të hyjë për të mbrojtur popullin serb në veri dhe kështu të zbatojë ndarjen e Kosovës”, tha Sonja Biserko, presidentja e Helsinkit,Komiteti për të Drejtat e Njeriut në Serbi.
Fraksion.com
