Nagorno-Karabakh do të pushojë së ekzistuari nga janari 2024, deklaron presidenti

Presidenti i shtetit të vetëshpallur separatist në Nagorno-Karabakh, Samvel Shahramanyan, nënshkroi të enjten një dekret për shpërbërjen e të gjitha institucioneve shtetërore nga 1 janari 2024 pas disfatës së tij nga Azerbajxhani.

Fitorja e Azerbajxhanit javën e kaluar pas një ofensive të shkurtër ushtarake shkaktoi një eksod të madh armenësh etnikë që jetonin në Nagorno-Karabakh dhe shënoi fundin e dekadave të konfliktit.

Dekreti i presidentit Samvel Shahramanyan bëri thirrje që të gjitha institucionet dhe organizatat e Republikës së Artsakhut – e cila nuk njihet ndërkombëtarisht – të shpërndahen deri në fillim të vitit të ardhshëm.

“Republika e Nagorno-Karabakh (Artsakh) pushon ekzistencën e saj”, thuhet në dekret, i cili u shpërnda në Facebook nga qeveria e Artsakhut.

Shahramanyan tha se vendimi ishte marrë “për shkak të situatës aktuale të vështirë ushtarako-politike”.

Fushata e Azerbajxhanit zgjati 24 orë, përpara se të dyja palët të binin dakord për një armëpushim të ndërmjetësuar nga Rusia, i cili pa forcat e armatosura të Karabakut të shpërbëheshin. Por presidenca e Azerbajxhanit këmbënguli që qeveria e Artsakhut të shpërndahej, duke paralajmëruar se, nëse nuk e bënin këtë, ofensiva do të vazhdonte “deri në fund”.

Dekreti i bëri thirrje Azerbajxhanit që të vëzhgojë “kalimin e lirë, të pakufizuar dhe të papenguar të popullatës së Nagorno-Karabakut, përfshirë militantët që hodhën armët, me pronat e tyre dhe mjetet e transportit përmes korridorit të Laçinit”.

Më shumë se gjysma e popullsisë së Nagorno-Karabakut është arratisur për në Armeni gjatë javës së kaluar, pasi Azerbajxhani hoqi bllokadën e korridorit Lachin – e vetmja rrugë që lidh enklavën me Armeninë – për të lejuar njerëzit të largohen./cnn

Fraksion.com