Rama: Serbia po i fryn si asnjëherë më parë zjarrit të një konflikti të armatosur!
Kryeministri i Republikës së Shqipërisë, Edi Rama, me anë të një postimi në X ka shprehur shqetësimin e tij për veprimin e djeshëm të Serbisë pas sulmit terrorist ndaj Kosovës.
Ai beson që shpallja e ditës së zisë nga Serbia është “sinjali më i keq që Serbia mund t’i jepte rajonit dhe komunitetit euro-atlantik”.
Kryeministri shqiptar shpreh bindjen se me këtë veprim, Serbia “i fryn si asnjëherë më parë qysh prej vitit 1999, zjarrit të një konflikti të armatosur!”
Kujtojmë që Serbia njoftoi për shpalljen e një ditë zie për terroristët që vdiqën në sulmin në Bajskë. Ky veprim është denoncuar edhe brenda vendit tonë.
Por, Rama vazhdon me fjalët e tij duke denoncuar Serbinë e duke kërkuar që të dënohet nga e gjithë bashkësia euro-atlantike.
“Ky është momenti që Serbia duhet ta ndajë qartë dhe prerë mendjen nëse do të jetë me Evropën dhe botën demokratike të shekullit XXI apo me hijen e vetvetes së fundshekullit XX; me vlerat dhe parimet e Bashkimit Evropian e të komunitetit euro-atlantik apo me fantazmat dhe me krimet e të shkuarës së saj të palavdishme të viteve ’90.”
Ai ka kërkuar që edhe BE-ja me ShBA-të qartazi të ndezin (sic) alarmin demokratik për të ndalur përshkallëzimin e situatës në veri të vendit.
“Prandaj, apeli i Shqipërisë për miqtë e mëdhenj e aleatët strategjikë të Ballkanit Perëndimor është: Veprimin e sotëm, mos e lini për nesër!”
Por, kryeministri Rama ka vazhduar duke kërkuar që edhe Kosova të reflektojë seriozisht për të ndarë mendjen: “nëse do të vazhdojë në kursin e veprimit të shkëputur nga miqtë e saj të pazëvendësueshëm dhe aleatët e saj të padiskutueshëm apo do të veprojë në harmoni e mirëkuptim me komunitetin euro-atlantik, për të arritur qëllimin më madhor në histori pas fitores së luftës e shpalljes së pavarësisë, njohjen përfundimtare si shtet anëtar i këtij komuniteti!”
Duhet kujtuar se Lista Serbe – partia kryesore që vepron në Kosovë me nënkryetar kriminelin Millan Radojçiqit – ka shpallur tri ditë zie.
Zija e shpallur zyrtarisht në Beograd për pjesëtarët e grupit të armatosur që u asgjësuan nga forcat e sigurisë së Republikës së Kosovës, pasi nga ai grup iu mor jeta një efektivi të policisë është sinjali më i keq që Serbia mund t’i jepte rajonit dhe komunitetit euro-atlantik!…
— Edi Rama (@ediramaal) September 26, 2023
Fraksion.com
