Varroset sot me nderime shtetërore polici që u vra nga grupet e armatosura serbe në veri të Kosovës

Afrim Bunjaku, polici i Kosovës që ra dje në krye të detyrës gjatë një përleshje me armë zjarri me një grup të armatosur serb në fshatin Banjskë të Zveçanit, do të varroset ditën e sotme.

Varrimi i tij do të bëhet në varrezat e fshatit Samadrexhë në orën 16:00.

Varrimi i tij do të bëhet me nderime dhe ceremoni shtetërore, ku pritet të jenë prezent edhe figurat më të larta të shtetit në Kosovë.

Dhimbja për humbjen e rreshterit nuk është sot vetëm në familjen e të ndjerit, por te çdo qytetar që dëshmoi humbjen e një tjetër bashkatdhetari në mision për të ruajtur integritetin territorial të vendit.

Në trotuaret e qytetit dhe në institucione të ndryshme, këtë mbrëmje u ndezën qirinj për 50-vjeçarin nga Samadrexha e Vushtrrisë.

Përfaqësues të institucioneve të Kosovës, ambasadori amerikan, kryetari i Komunës së Prishtinës, e policë të tjerë i mbajtën homazhet para Stacionit Policor Qendër në Prishtinë.

Ngjarja e paprecedentë ndodhi në orët e para të mëngjesit në fshatin Banjska të Leposaviçit. Persona të armatosur i bllokuan rrugën makinës së policisë me dy kamionë në aksin Mitrovicë-Leposaviç. Më pas, qëlluan në drejtim të makinës së policisë, ku për pasojë humbi jetën efektivi Afrim Bunjaku.

Me pozicion rreshter, prej vitesh Bunjaku shërbeu në uniformat blu të vendit të tij. Babai i dy djemve dhe një vajze ishte transferuar në Zveçan që pas dorëheqjes së bujshme të serbëve nga strukturat policore. Vetëm para një jave Afrim Bunjaku mori mirënjohje për shërbimin e kryer në Policinë e Kosovës.

Bunjaku e kreu me nder e krenari deri në frymën e fundit detyrën e tij, janë shprehur mes dhimbjes familjarët e heroit.

“Të vdesësh për atdhe është sikur të rilindësh përsëri”, tha një prej të afërmve, frazë që u vendos sot në hyrje të qytetit të Prishtinës.

Fraksion.com