Tension në Kuvend, Nikolla njoftoi se PD bëri Açkën kryetare grupi, Bardhi: Komplot!
Në seancën e sotme plenare janë shkaktuar sërish debate në Kuvend për postin e kreut të grupit parlamentar të PD-së.
Pasi kryetarja e Kuvendit Lindita Nikolla ka komunikuar anëtarët e Kryesisë së re të Partisë Demokratike, duke u bazuar në dokumentin që ajo lexoi, kryetari i PD-së ligjore ka autorizuar në krye të grupit parlamentar të PD-së Flutura Açkën.
“Me propozim të kryetarit të partisë vendoset përbërja e Kryesisë së Grupit Parlamentar të PD: Flutura Açka nënkryetare e autorizuar për përfaqësimin e grupit parlamentar në mungesë të kryetarit. Kreshnik Çollaku nënkryetar, Arbi Agalliu Sekretar, Oriola Pampuri Zëdhënëse. Firmosur nga kryetari Lulzim Basha i grupit”, njoftoi Nikolla.
Pas këtij komunikimi, ka qenë i menjëhershëm reagimi i Gazment Bardhit, i cili e ka mbajtur më parë postin e kreut të grupit parlamentar.
Ai ka shkaktoi tension dhe debate të ashpra në parlament.
“Nuk i drejtohesh dot askujt si kryetar i PD, nëse ty të vjen dokument me emër të grupit parlamentar të PD-së ti nuk thërret anëtarë të PS për ta marrë në shqyrtim, por dokumentacionin e vë në dispozicion të deputetëve opozitare. Sot kryetarja e Kuvendit është qesharake”, u shpreh Bardhi.
Ai e ka quajtur “një komplot” shkresën e PD që lexoi kryetarja e Kuvendit, Lindita Nikolla, ku njoftohej se Flutura Açka ishte kryetarja e grupit parlamentar.
Ky i fundit me tone të forta u shpreh kundër, ndërsa pohoi se nuk po diskutohej për kreun e grupit të PS-së.
Ndërkohë, Nikolla tha se nuk i merrte leje se kujt ia jepte fjalën apo se si do të procedohej në Kuvend.
Nikolla kërkoi ndërhyrjen e Gardës.
