Deputetja Bakiu ikën nga Mediu shkon te Basha, ja kush e zëvendëson te PR

Ka nisur me zhvillime seanca e sotme plenare në Kuvendin e Shqipërisë. Kryeparlamentarja Lindita Nikolla ka deklaruar se deputetja Merita Bakiu ka njoftuar largimin nga grupi Parlamentar ‘Aleanca për Ndryshim’, me kryetar Fatmir Mediun, ndërsa po këtij grupi i është bashkuar Petrit Doda.

Gazetari Osman Stafa raporton për BalkanWeb se Bakiu është mbështetëse e Lulzim Bashës, dhe duket se ky i fundit po mbledh deputetët mbështetës të tij, të cilët janë nëpër grupe të tjera parlamentare. Ndërkohë Bakiut do t’i duhen tashmë 6 muaj për të aderuar në një grup tjetër parlamentar.

Rendi i Ditës:

Sakaq, në rend të ditës janë parashikua dhjetë pika, mes tyre shkarkimi i ministrit të Financave dhe Ekonomisë, Delina Ibrahimaj dhe emërimi në vend të saj i Ervin Metes. Po ashtu, është dhe votimi për emërimin në detyrën e ministrit të Shtetit për Sipërmarrjen dhe Klimën e Biznesit. Ndërkohë, në pikat e tjera të rendit të ditës janë, diskutimi dhe miratimi i disa marrëveshjeve dhe ndryshimeve ligjore.

Kështu, pritet diskutimi dhe miratimi i projektligjit për ratifikimin e marrëveshjes, ndërmjet Republikës së Shqipërisë dhe Malit të Zi, për sigurimet shoqërore”, projektligji “Për aderimin e Republikës së Shqipërisë në marrëveshjen e pjesshme të zgjeruar (EPA) për themelimin e regjistrit të dëmeve të shkaktuara nga agresioni i Federatës Ruse kundër Ukrainës”, projektligji “Për miratimin e rezolutës nr.463 (2022), të Bordit Drejtues të CEB, “Rritja e kapitalit të Bankës për Zhvillim të Këshillit të Evropës (CEB)””.

Në rend të ditës janë diskutimi dhe miratimi i projektligjit “Për ratifikimin e marrëveshjes, ndërmjet Këshillit të Ministrave të Republikës së Shqipërisë dhe Qeverisë së Republikës së Sllovakisë, për eliminimin e tatimit të dyfishtë në lidhje me tatimet mbi të ardhurat dhe parandalimin dhe shmangien e evazionit tatimor”, projektligji “Për ratifikimin e marrëveshjes, ndërmjet Këshillit të Ministrave të Republikës së Shqipërisë dhe qeverisë së Republikës Federale të Gjermanisë, për bashkëpunimin teknik 2022 për projektin “Ekonomia qarkulluese për zhvillimin e qëndrueshëm urban në Shqipëri”. Projektligji “Për disa shtesa dhe ndryshime në ligjin nr.74/2014, “Për armët”, të ndryshuar”. Si edhe Projektligji “Për disa shtesa dhe ndryshime në ligjin nr. 8577, “Për organizimin dhe funksionimin e Gjykatës Kushtetuese të Republikës së Shqipërisë, të ndryshuar.

Fraksion.com