Tentoi të korruptonte punonjësin e Policisë, arrestohet drejtuesi i mjetit

Policia e Tiranës ka arrestuar një drejtues automjeti, i cili tentoi të korruptonte punonjësin e Policisë.

Pas këtij arrestimi, shkon në 77 numri i drejtuesve të automjeteve, që kanë tentuar të korruptojnë punonjësit e Policisë, me qëllim shmangien e detyrimeve ligjore apo të masave administrative.

Policia Rrugore e Tiranë njofton se ka vijuar kontrollet e shtuara dhe të dedikuara, me qëllim rritjen e parametrave të sigurisë rrugore në kryeqytet.

Gjatë kontrolleve parandaluese, shërbimet e Komisariatit të Policisë Rrugore kanë ndaluar automjetin me drejtues shtetasin K. D., pasi është konstatuar duke përdorur aparatin celular gjatë drejtimit të mjetit.

Me qëllim shmangien e masës administrative, drejtuesi i automjetit ka tentuar të korruptojë punonjësin e Policisë, duke i ofruar atij një shumë parash.

Në vijim të veprimeve, u referuan materialet procedurale në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, për veprën penale “Korrupsioni aktiv i personave që ushtrojnë funksione publike”.

Fraksion.com