Xhaçka: Çështja ‘Bejleri’ nuk duhet të niset nga ligji grek por nga ligji shqiptar

Ministrja për Europën dhe Punët e Jashtme, Olta Xhaçka reagoi sot në lidhje me deklaratën e ministrit të Jashtëm të Greqisë për çështjen Beleri.

Ministrja Xhaçka theksoi në Twitter edhe njëherë se çështja i takon organeve të drejtësisë dhe jo qeverisë.

“Nuk ka mundësi që miqtë dhe fqinjët tanë grek të jenë të vetmit që kanë të drejtë, kur këmbëngulin në një kërkesë të rrëzuar nga gjykatat shqiptare dhe të qartë për miqtë e partnerët e tjerë, të cilët thonë se kjo është një çështje e drejtësisë shqiptare!”, tha Xhaçka.

“Organet e reja të drejtësisë shqiptare kanë folur qartë me vendimet e tyre dhe qeveria shqiptare ka folur qartë po ashtu: Çështja e betimit të kryebashkiakut të ndaluar nga drejtësia është një çështje e drejtësisë. Jo e qeverisë shqiptare. As e qeverisë greke”, vijoi Xhaçka.

“Homologut tim grek për të cilin kam shumë respekt, i kam thënë se për këtë çështje nuk duhet të niset nga ligji grek por nga ligji shqiptar. Dhe sipas ligjit shqiptar, s’ka vullnet politik që e nxjerr zotin Beleri nga burgu apo që fut noter në burg që ai të bëj betimin si kryebashkiak. Me keqardhje po kjo është kështu dhe vetëm kështu”, përfundoi Xhaçka.

Fraksion.com