Dojna Mema nuk do rikthehet në ekran së shpejti, por po sjell një projekt që po e ndërton vetë

Për herë të fundit Dojna Mema ishte në ekran me emisionin “Big Brother VIP Fan Club 1” që përfundoi në shkurt 2022. Pas tij, Dojna mori një pushim duke u shkëputur nga ekrani pasi mirëpriti në jetë edhe fëmijën e saj të parë, djalin Nolan Sol. Pas lindjes, Dojna deklaroi në një intervistë se do rikthehet në ekran dhe të gjithë prisnim ta shihnim sërish në “Fan Club”. Por, këtë vit ai iu besua Megi Pojanit.

Para pak muajsh, Dojna deklaroi se nuk është shumë opitimiste për gjendjen e mediave shqiptare. Ajo tha se asnjë program televiziv nuk e frymëzon aktualisht, teksa shtoi se ndjekësit do e shohim shumë shpejt, por nuk zbuloi se ku.

“Ajo që po ndodh aktualisht në media nuk është situata më stimuluese për formën si unë e shoh median, atë që media duhet të përfaqësojë. Edhe për formën si unë e shoh rolin e moderatorit, prezantuesit, gazetarit, personit që është në vijë të parë dhe në kontakt direkt me publikun. Le të themi se aktualisht që flasim asnjë nga programet, që bëhet nuk më stimulon aspak. Por, ju do më shihni shumë shpejt. Ashtu si ju dëshiron të më shihni”– tha Dojna asokohe.

Sakaq, në një seri me pyetje-përgjigje me ndjekësit e saj në Instagram të realizuar së fundmi, moderatorja është pyetur sërish për rikthimin në ekran. Ajo thotë se nuk e ka një plan të tillë por po sjell një surprizë.

“Je shumë e bukur Dojna, shumë e sjellshme, shumë e zgjuar. Kur do të shohim në tv?“-shkruan ndjekësi të cilit Dojna i përgjigjet: “Faleminderit shumë, por të gjitha ato që përmende më lart janë arsyet për të mos qenë në ekran. Ne do të shihemi shumë shpejt me një projekt që po e ndërtoj vetë nga shtylla e parë.”

Fraksion.com