“Mos u ulni nëpër kafene, u përcillen kriminelëve informacione”, Taulant Balla porosit drejtorët e policive

Pas marrjes zyrtare të detyrës, ministri i ri i Brendshëm Taulant Balla ka mbledhur për herë të parë sot drejtuesit policisë, për tu komunikuar porositë dhe prioritete e detyrës së tij në krye të Ministrisë së Brendshme.

Ministri Balla gjithashtu u kërkoi drejtuesve të policisë së shtetit të mos ulen nëpër kafe e restorante as gjatë dhe as pas pune

“Ka një kod etik të kahershëm tanimë, por të pazbatuar deri tani, që thotë se drejtuesit e policisë së shtetit nuk mund të ulen nëpër kafe e restorante as gjatë pune, as pas pune, përveçse për arsye familjare apo arsye të tjera për të cilat kanë vënë më parë në dijeni eprorët. Por jo vetëm kështu nuk ndodh, por ndodh fatkeqësisht që edhe që drejtorë e shefa komisariatesh, të kenë kontakte të papërshtatshme nëpër lokale, ku deri edhe u përcillen kriminelëve informacione sensitive të punës dhe të aksioneve policore.

Natyrisht edhe në rrugë të tjera, po kjo rrugë që po them është përveçse po aq skandaloze sa të tjerat, edhe një karshëllëk poshtërues për gjakun e dëshmorëve të Policisë së Shtetit dhe për çdo qytetar të Republikës së Shqipërisë, përveçëse është edhe shembulli më i keq dhe më demotivues për punonjësit e Policisë së Shtetit në vartësinë e drejtorëve e shefave të këtij profili kaq të ulët moral.”, tha Balla.

Fraksion.com