Zelensky: “Pasiguria” për anëtarësimin e Ukrainës në NATO është motivim për Rusinë që “të vazhdojë terrorin e saj”

“Pasiguria” për anëtarësimin e Ukrainës në NATO është motivim për Rusinë që të “vazhdojë terrorin e saj”, tha presidenti ukrainas Volodymyr Zelensky në një deklaratë të formuluar të martën në llogarinë e tij zyrtare në Twitter.

“Ne i vlerësojmë aleatët tanë. Ne vlerësojmë sigurinë tonë të përbashkët. Dhe ne vlerësojmë gjithmonë një bisedë të hapur. Ukraina do të përfaqësohet në samitin e NATO-s në Vilnius. Sepse ka të bëjë me respektin,” tha Zelensky në një mesazh të gjatë të postuar në anglisht.

“Por Ukraina gjithashtu meriton respekt. Tani, rrugës për në Vilnius, ne morëm sinjale se formulime të caktuara po diskutohen pa Ukrainën. Dhe dua të theksoj se ky formulim ka të bëjë me ftesën për t’u bërë anëtare e NATO-s, jo me anëtarësimin e Ukrainës. “tha ai.
Zelensky do të marrë pjesë në takimet me liderët e NATO-s të mërkurën në Vilnius, Lituani.

“Është e paprecedentë dhe absurde kur nuk përcaktohet afati kohor as për ftesën dhe as për anëtarësimin e Ukrainës. Ndërkohë që në të njëjtën kohë formulime të paqarta rreth ‘kushteve’ shtohen edhe për ftesën e Ukrainës,” tha Zelensky.

“Duket se nuk ka gatishmëri as për ta ftuar Ukrainën në NATO dhe as për ta bërë atë anëtare të Aleancës. Kjo do të thotë se po lihet një dritare mundësie për të negociuar anëtarësimin e Ukrainës në NATO në negociatat me Rusinë. Dhe për Rusinë, kjo do të thotë motivim për të vazhduar terrorin e saj”, shtoi ai.

“Pasiguria është dobësi. Dhe unë do ta diskutoj hapur këtë në samit,” tha Zelensky.

Fraksion.com