Ish-presidenti amerikan, Bill Clinton viziton shqiptarët për herë të katërt

Ish-presidenti amerikan, Bill Clinton, do të qëndrojë për dy ditë në Shqipëri, 3 dhe 4 korrik 2023, me ftesën e kryeministrit shqiptar, Edi Rama.

Kjo është vizita e parë e Bill Clintonit në Tiranë, ndërkaq 11 vjet më parë Shqipërinë e vizitoi bashkëshortja e tij, Hillary Clinton, që në atë kohë mbante postin e sekretares së Shtetit.

Ish Presidenti Bill Clinton ka vizituar për herë të parë Kosovën në maj të vitit 1999. Ai po ashtu ishte në Kosovë më 2009 dhe 2019.

Në vizitën e tij të fundit, ai ishte i shoqëruar me ish-sekretaren e ndjerë amerikane, Madeleine Albright. Ata morën pjesë në ceremonitë e mbajtura për 20-vjetorin e hyrjes së trupave të NATO-s në Kosovë, që shënohet si Dita e Çlirimit.

Bill Clinton ishte president i SHBA-së në kohën kur po zhvillohej lufta në Kosovë dhe ai luajti rol kyç që NATO të niste bombardimet ndaj caqeve serbe, që çuan në çlirimin e Kosovës. Clinton  ka deklaruar se vendimi për nisjen e bombardimeve ishte marr për të mbrojtur mijëra njerëz të pafajshëm në Kosovë nga regjimi i liderit të atëhershëm serb, Sllobodan Millosheviq.

Ish Presidenti  Bill Clinton  do të arrijë në Tiranë pasditen e së hënës më 3 korrik 2023.

Një ceremoni për nder të ish-presidentit amerikan do të zhvillohet në orën 19:00 në bulevardin “Dëshmorët e Kombit”, përballë Kryeministrisë shqiptare, ku do të marrin pjesë edhe qytetarë.

Në këtë ceremoni ish-presidentit Clinton do t’i ndahet “Ylli i Mirënjohjes për Arritjet Publike”. Gjatë kësaj ceremonie, Clinton pritet t’iu drejtohet të pranishmëve.

Fraksion.com