Lirohen tre policët e Kosovës të arrestuar nga Serbia

Janë liruar tre zyrtarët policorë të Kosovës, të arrestuar nga autoritetet serbe më 14 qershor.

Sekretari i Parë i Zyrës Ndërlidhëse të Kosovës në Beograd, Fatmir Haxholli, ka thënë të hënën në rrjetin social Facebook se tre zyrtarët – Rifat Zeka, Beqir Sefa dhe Mustafë Shemi- kanë dalë të hënën para një gjykate në Kralevë.

Atyre u është caktuar masa e paraburgimit më 16 qershor, por nuk është ditur kohëzgjatja.

Prishtina ka pretenduar se ata janë kidnapuar nga territori i Kosovës, derisa Beogradi ka deklaruar se ata janë arrestuar në territorin serb.

“Çdo sekondë i humbur deri në kthimin e tyre në Republikën e Kosovës, në krye të detyrave, konstituon një impuls dhe sjellje joracionale, me qëllim kamuflimin e një akti bizar”, ka thënë Haxholli përmes një postimi në Facebook.

Autoritetet serbe patën thënë se ata dyshohet të kenë kryer veprën penale: prodhim, posedim, mbajtje dhe trafikim i paligjshëm i armëve dhe lëndëve plasëse, e cila bart dënimin deri në 12 vjet burg.

Komuniteti ndërkombëtar ka kërkuar vazhdimisht lirimin e tyre pa kushte.

Lajmi për arrestimin e tyre pati ardhur në kohën e rritjes së tensioneve në mes të Kosovës dhe Serbisë.

Fraksion.com