Peleshi takon shefin e Shtabit të Përgjithshëm të Rumanisë: Mbështesim përpjekjet për një mjedis të sigurt

Ministri i Mbrojtjes, z. Niko Peleshi priti në një takim shefin e Shtabit të Përgjithshëm të Rumanisë gjeneral Daniel Petrescu, i cili shoqërohej nga ambasadori i Rumanisë në vendin tonë, z. Octavian Șerban dhe atasheu ushtarak, kolonel Valerică Piroșcă.

Në këtë takim u vlerësua bashkëpunimi mes dy vendeve në fushën e Mbrojtjes. Diskutimi u përqendrua veçanërisht në zhvillimet dhe angazhimet e të dy vendeve në mjedisin aktual të sigurisë, përpjekjet e përbashkëta për mbështetjen e Aleancës ndaj Ukrainës.

Mes ministrit të Mbrojtjes Niko Peleshi dhe delegacionit të Rumanisë u diskutua mbi identifikimin e fushave të reja për bashkëpunim të përbashkët në fushën e Mbrojtjes dhe të Sigurisë, si dhe përpjekjet e pandalshme të vendeve për kufizimin e influencave keqdashëse në rajonet respektivë.

Peleshi theksoi se Shqipëria dhe Rumania, si dy aleatë të NATO-s kanë angazhimin e plotë të mbështesin përpjekjet për një mjedis të sigurt, për të ndalur influencat keqdashëse në rajonet respektive.

“Me Shefin e Shtabit të Përgjithshëm të Rumanisë Gjeneral Daniel Petrescu, me të cilin diskutuan për forcimin e mëtejshëm të bashkëpunimit në fushën e mbrojtjes mes të dy vendeve. Si dy aleatë të NATO-s kemi angazhimin e plotë të mbështesim përpjekjet për një mjedis të sigurt, për të ndalur influencat keqdashëse në rajonet respektive”, shkroi Peleshi në një postim në rrjetet sociale.

Shefi i Shtabit të Përgjithshëm të Rumanisë gjeneral Daniel Petrescu, i cili ndodhet për një vizitë zyrtare në Shqipëri pati edhe një takim me shefin e Shtabit të Përgjithshëm të RSH-së, gjeneral brigade Arben Kingji.

Fraksion.com