Rama në Sarandë: Edhe këtu Kadastra është bërë pasqyra e turpit të PS-së

Kryeministri, Edi Rama vijoi sot turin e falënderimeve për rezultatin e zgjedhjeve vendore në një takim me banorët e Sarandës.

Kryeministri e konsideroi fitoren domethënëse, ndërsa u shpreh se është po ashtu edhe një sfidë e madhe.

“Pas daljes së rezultatit bëhet më e qartë se sa e madhe është sfida që na kanë bërë zgjedhësit. Ne jemi në mesin e mandatit të tretë qeverisës dhe kemi arritur në 14 maj në rang vendi rezultatin më të mirë historik të PS-së në numrin e zgjedhësve që kanë votuar për PS-në. Kemi arritur ta kemi PS-në forcë të parë në pothuajse të gjitha bashkitë e vendit, por edhe në bashki ku ne jemi forcë e parë për herë të parë nga zgjedhjet e para pluraliste”, tha Rama.

Kjo, sipas tij, “është domethënëse për pritshmërinë e madhe të njerëzve nga PS”.

“Gjëja më e rëndësishme për ne që udhëheqim është të kuptojmë se vota e 14 majit nuk është shprehje e një kënaqësie të madhe të njerëzve në raport me qeverisjen tonë në rang kombëtar apo vendor. Njerëzit nuk kanë votuar ashtu se janë shumë të kënaqur nga puna jonë. Kanë votuar ashtu pavarësisht se janë të pakënaqur se presin më shumë nga ne”, shtoi ai.

Kryeministri vlerësoi se është një vlerësim i jashtëzakonshëm që në mes të mandatit të tretë njerëzit të kenë pritshmëri të larta. Por sipas tij, “është edhe përgjegjësi e jashtëzakonshme për ta kuptuar atë votë dhe për të mos pasur asnjë vetëkënaqësi, por për të punuar shumë më tepër akoma”.

Rama kërkoi nga të zgjedhurit vendorë që të jenë të njerëzishëm me të gjithë qytetarët dhe që bashkitë të jenë dera e parë e hapur për çdo qytetar.

“Kjo votë është një përgjegjësi e jashtëzakonshme për të përmirësuar akoma më shumë marrëdhënien me qytetarët. Ne kemi dixhitalizuar shërbimet por kemi një pjesë të tyre me kontakt të drejtpërdrejt. Dhe këtu kemi probleme si në rastin e Kadastrës që është bërë në disa vende pasqyra e turpit të PS-së. Njerëz që kanë vajtur të punojnë në Kadastër me emrin socialist dhe e kanë bërë zhele flamurin e PS-së kanë nëpërkëmbur kontributin, besimin, mbështetjen dhe investimin e qindra mijëra të tjerëve që votojnë PS-në”, shtoi ai.

Fraksion.com