Trafikantë klandestinësh qëllojnë me armë efektivët shqiptarë në kufirin me Kosovën: 6 në pranga 1 në kërkim
Një ngjarje e rëndë është regjistruar paraditen e sotme në kufirin mes Shqipërisë dhe Kosovës, teksa në drejtim të oficerëve shqiptarë është qëlluar me armë nga trafikantë klandestinësh nga vendet e lindjes së mesme.
5 sirianë dhe 1 algjerianë janë vënë në pranga pasi kanë hapur zjarr në drejtim të policisë, teksa po tentonin të të kalonin nga Shqipëria drejt Kosovës me emigrantë të paligjshëm. Fatmirësisht asnjë prej efektivëve nuk ka mbetur i lënduar. Përveç 6 personave tashmë të arrestuar, një tjetër algjerian është shpallur në kërkim pasi arriti të shpëtonte.
Grupi i tyre drejtonte rrjetin e trafikut të emigrantëve nga vendet e treta, nga Greqia për në Shqipëri, Kosovë dhe Serbi, me destinacion final shtetet e BE-së u zbulua nga kamerat e fshehta të policisë të vendosura në kufirin Shqipëri – Kosovë. Kur u konstatuan nga policia, trafikantët e armatosur tentuan të arratiseshin duke qëlluar me armë drejt policisë. Plumbat përshkuan veshjet e dy efektivëve, por fatmirësisht nuk janë në rrezik për jetën.
Pas disa orësh ndjekje nga shërbimet e Policisë vendore dhe kufitare të Kukësit, 6 prej tyre u arrestuan.
Policia e Kukësit jep informacion zyrtar për operacionin policor të koduar “Strukturimi” i finalizuar së bashku me policinë kufitare dhe Policinë e Kosovës ku ka pasur dhe shkëmbim zjarri mes efektivëve dhe trafikantëve. Madje mësohet se plumbat kanë përshkuar rrobat e dy punonjësve të policisë, të cilët kanë shpëtuar mrekullisht.
Një grup i strukturuar kriminal që organizonte dhe drejtonte një rrjet të trafikut ndërkombëtar të emigrantëve nga vendet e treta, nga Greqia për në Shqipëri, Kosovë dhe Serbi, me destinacion final shtetet e BE-së është goditur.
Më pranga kanë rënë shtetasit: Ayoub Bahhoo, Muhaned Nasir, Nagid Alabdahah, Muhamed Shehab, Mohamed Radawin dhe Rabii Lqadi, si dhe u shpall në kërkim shtetasi Sultan Grimashi.
Të armatosur organizonin dhe drejtonin veprimtarinë kriminale të kalimit të paligjshëm të emigrantëve nga vendet e treta, përmes kufijve të gjelbër, mes Greqisë, Shqipërisë, Kosovës dhe Serbisë, vihen në pranga 6 shtetas sirianë dhe algjerianë, si dhe shpallet në kërkim një shtetas tjetër algjerian.
Në fshatin Morinë, në kufirin e gjelbër me Kosovën, shërbimet e Policisë kanë lokalizuar grupin e shtetasve të huaj që ushtronte veprimtarinë kriminale të dhënies ndihmë emigrantëve nga vendet e treta, për kalim të paligjshëm të kufirit.
Shërbimet e Policisë iu kanë bërë thirrje këtyre shtetasve, që të ndalojnë, por disa prej tyre kanë hapur zjarr në drejtim të punonjësve të Policisë duke rrezikuar seriozisht jetën e punonjësve të Policisë.
Menjëherë është komunikuar me Policinë Kufitare të Kosovës, me qëllim bllokimin e kufirit në anën e Kosovës, dhe pas disa orësh ndjekje, shërbimet e Policisë kanë bërë të mundur kapjen dhe prangosjen e 6 prej tyre.
Në vijim të veprimeve procedurale për këtë rast, specialistët për Hetimin e Trafiqeve të Paligjshme dhe Narkotikëve të DVP Kukës arrestuan në flagrancë, për veprat penale “Vrasja e punonjësve të Policisë së Shtetit”, mbetur në tentativë, kryer në bashkëpunim, “Prodhimi dhe mbajtja pa leje e armëve, armëve shpërthyese dhe municionit” dhe “Ndihma për kalim të paligjshëm të kufijve”, shtetasit :
-A. B., 27 vjeç, me shtetësi algjeriane, si dhe M. N., 25 vjeç, N. A., 20 vjeç, M. Sh., 21 vjeç, M. R., 20 vjeç dhe R. L., 40 vjeç, të pestë me shtetësi siriane.
Gjithashtu, në kuadër të këtij operacioni, u shpall në kërkim shtetasi S. G., 27 vjeç, me shtetësi algjeriane.
Operacioni “Strukturimi” vijon për gjetjen e armëve të zjarrit të përdorura në këtë rast, si dhe për kapjen e shtetasit algjerian të shpallur në kërkim.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme.
