BE i bën thirrje Kinës që “t’i bëjë presion Rusisë që të ndalojë agresionin e saj ushtarak”

Bashkimi Evropian i ka bërë thirrje Kinës që të “shtyjë Rusinë që të ndalojë agresionin e saj ushtarak”, tha të premten presidenti i Këshillit të BE-së.

Duke folur para samitit të G7 në Hiroshima, Japoni, Charles Michel theksoi gjithashtu rëndësinë e forcimit të marrëdhënieve të bllokut me Pekinin, duke thënë se një “marrëdhënie e qëndrueshme dhe konstruktive me Kinën është në interesin tonë të përbashkët”.

Megjithatë, Michel shtoi se BE do të mbetet “e vendosur” në vlerat e saj dhe do të promovojë interesat e saj.

Michel theksoi “nevojën për t’u angazhuar së bashku me Kinën në sfidat globale: ndryshimi i klimës, ruajtja e burimeve natyrore; biodiversiteti; qëndrueshmëria e borxhit”, duke pasur parasysh rolin e saj në komunitetin ndërkombëtar dhe ekonominë e saj të shtrirë.

“Kina ka një përgjegjësi të veçantë në botë. Duhet të luajë sipas rregullave ndërkombëtare. Dhe ne i bëjmë thirrje Kinës që të bëjë presion ndaj Rusisë për të ndaluar agresionin e saj ushtarak”, tha Michel.
“Ne do të vazhdojmë të shprehim shqetësimet tona për të drejtat e njeriut qoftë në Hong Kong, në Xinjiang apo në Tibet. Ne nuk do të tolerojmë ndërhyrje në vendet tona që do të minonin shoqëritë tona demokratike,” shtoi ai.

Michel shtoi se BE-ja do të punojë për të “zvogëluar varësinë tonë të tepërt” nga Kina dhe “të krijojë një fushë të vërtetë loje të barabartë për kompanitë tona dhe për punëtorët tanë”.

Ai ritheksoi gjithashtu angazhimin e bllokut ndaj “politikës së saj të një Kine” për Tajvanin, duke shtuar se nuk kishte “asnjë ndryshim të njëanshëm të status quo-së” nga ana e BE-së.

Kryeministri rus do të vizitojë Kinën javën e ardhshme për bisedime tregtare, tha Moska të premten.

Fraksion.com