OKB: Asnjë anije me grurë nuk është inspektuar për 2 ditë. Ukraina fajëson Rusinë për vonesat

Asnjë anije nuk është inspektuar për dy ditët e fundit sipas një marrëveshjeje të ndërmjetësuar nga OKB-ja për të lehtësuar eksportet jetike të grurit nga Ukraina, tha të hënën Zyra e Koordinatorit të OKB-së për Iniciativën e Drithërave të Detit të Zi.

“Qendra e Përbashkët Koordinuese (QKK) nuk ka kryer asnjë inspektim dje dhe sot”, thuhet në deklaratë, duke shtuar se shkalla e inspektimit ka rënë që nga fillimi i muajit.
Më herët të hënën, zyrtarët ukrainas fajësuan Rusinë për ndalimin efektiv të nismës, duke akuzuar Moskën për mosregjistrimin ose inspektimin e anijeve që synonin të shkonin në dhe nga portet ukrainase.

Nisma u krijua në korrik 2022 për të garantuar kalim të sigurt për anijet që eksportojnë drithë dhe fara vajore nga portet ukrainase në Detin e Zi, shumica e të cilave mbështet operacionet humanitare në vendet shumë të varura si Afganistani, Etiopia, Somalia dhe Jemeni.

Marrëveshja u zgjat për herë të fundit më 18 mars për 60 ditë dhe është caktuar të skadojë më 18 maj. Bisedimet mes palëve kryesore nuk kanë sjellë deri tani asnjë marrëveshje.

Fraksion.com