“Situata s’ju vë nën akuzë”, Beci letër shkodranëve: Ambicia ime, zhvillimi i Shkodrës dhe mirëqenia!
Kandidati i Partisë Socialiste për kryetar bashkie në Shkodër, Benet Beci, në një letër drejtuar qytetarëve shkodranë, u ndal tek projektet që parashikon të zbatojë në këtë bashki, nëse fiton zgjedhjet e 14 majit.
“Prej shumë vitesh, institucioni më i rëndësishëm i qytetit tonë, është i përfshirë në problematika, të cilat vijnë për një pafundësi shkaqesh, përfshirë edhe ato të përplasjeve politike. Kjo situatë nuk ju vë aspak nën akuzë, ju, specialistët që keni punuar dhe punoni me përkushtim për të mirën e këtij qyteti. Problemet janë tek mënyra e keqmenaxhimit dhe këtë më mirë se sa unë, e dini ju vetë, që si specialistë, e vuani çdo ditë në kurriz”, u shpreh Beci.
Beci u shpreh se, ambicia dhe politika e tij, nëse do të drejtojë këtë bashki, do të jetë zhvillimi i qytetit dhe fshatrave, dhe mirëqenia e shkodranëve.
“Ky është dhe do të mbetet prioriteti im dhe i të gjithë personave që do të punojnë në bashkinë e re të Shkodrës. Ne, së bashku, do të punojmë fort për t’i dhënë ritëm punës sonë dhe për të rritur frymën e bashkëpunimit, në mënyrë që bashkia e Shkodrës të mos jetë një vatër e militantizmit dhe parazitizmit të asnjë lloji, por të kthehet në një laborator idesh dhe përparimi”, tha ai.
Beci tha se, në bashkinë e re të Shkodrës nuk do të ketë më kuota përfaqësimi politik, por kuota të një përfaqësimi vlerash dhe intelekti, që së bashku do të krijojnë një ansambël fitues të çdo sfide për rimëkëmbjen e qytetit.
“Shkodra është e madhe, aq sa është e vogël. Një qytet ku të gjithë e njohim njëri-tjetrin dhe ku kemi shumë e shumë gjëra që na lidhin e na bashkojmë, e aspak gjëra që na ndajnë. Qyteti ka nevojë për përvojën dhe vlerën e gjithsecilit nga ju, specialistëve të mirëfilltë. Ju, që me përkushtim e keni mbajtur në këmbë këtë institucion, pavarësisht strategjive të gabuara drejtuese që i kanë bërë një dëm shumë të madh Shkodrës. Por jo të pariparueshëm”, tha ai.
Beci u kërkoi qytetarëve që të vijojnë punën normalisht, pa u ndikuar nga presionet politike që duan t’i përfshijnë kundër dëshirës në një fushatë të ethshme, agresive dhe përçarëse, që po bëhet në emrin e tyre.
“Përfshirja juaj në fushatë ju transformon nga specialistë në militantë. Një fenomen nga i cili Shkodra është dëmtuar në tri dekada, dhe për të cilën nuk ka aspak nevojë. Prandaj, deri më 14 maj, ju ftoj të refuzoni çdo përfshirje në një fushatë që nuk është e juaja, por e dikujt që po lufton fort vetëm për veten e tij. E nesërmja nuk do të ndryshojë aspak pozicionin tuaj të punës. Thjesht do të ndryshojë vizionin tonë të përbashkët për Shkodrën.
Dhe ju siguroj që do të jetë shumë herë më i mirë”, shkruan Beci në letrën drejtuar shkodranëve.
Fraksion.com
