Ministri i mbrojtjes: Pritshmëritë për kundërsulm ukrainas “të mbinxehura”

Ministri ukrainas i Mbrojtjes Oleksii Reznikov ka folur për pritjet e publikut për një kundërofensivë kundër forcave ruse, në një intervistë për gazetën RBC Ukraine.

I pyetur nëse “pritshmëritë e publikut për një kundërofensivë janë disi të mbinxehura” ai tha: “Jam dakord… Ato janë patjetër të mbinxehura. Të gjithë duan një fitore tjetër”.
Reznikov tha se sukseset e Ukrainës në rajonin e Kharkiv-it dhe në qytetin e Kherson-it, nënkuptonin se publiku tani besonte se një fitore për trupat e Ukrainës ishte e mundur. “Ata duan fitoren e radhës. Është normale… (këto) pritshmëri për sukses”, tha ai.

Ukraina ka bërë përpjekje për të fshehur fillimin e çdo kundërsulmi, siç shkroi Nick Paton Walsh i CNN në fillim të kësaj jave. Zëvendësja e Reznikov, Hanna Maliar, ka thënë më parë se kundërofensiva nuk do të shpallet.

Më vonë në intervistë, Reznikov tha se përparësia e Ukrainës ishte të forconte mbrojtjen e saj ajrore të epokës sovjetike: “Vendi duhet të mbijetojë dhe për këtë qëllim, mbrojtja ajrore është numër një. Ne kemi një sistem sovjetik që po i mbaron raketat”.

“Kjo nuk është  një distancë sprinti… Ne po vrapojmë një maratonë. Nuk mund të them se sa kilometra jemi nga fundi”, shtoi ai.

Fraksion.com