Rusia dëbon 10 diplomatë norvegjezë nga ambasada në Moskë

Dhjetë diplomatë që punojnë në ambasadën e Norvegjisë në Moskë u është thënë të largohen nga Rusia, tha të mërkurën një zëdhënës i Ministrisë së Punëve të Jashtme të Norvegjisë.

“Ambasadori i Norvegjisë në Moskë u informua sot nga Ministria e Punëve të Jashtme ruse se 10 diplomatë tanë në Ambasadën në Moskë janë shpallur persona jo gratae në Rusi. Diplomatët duhet të largohen nga Rusia brenda një kohe të shkurtër”, tha zëdhënësi, Ragnhild Simenstad.

Sipas zëdhënësit, Oslo e konsideron lëvizjen e Moskës si një reagim ndaj dëbimit nga Norvegjia të 15 punonjësve të ambasadës ruse në fillim të këtij muaji me akuza për spiunazh.

Ambasadori norvegjez u thirr nga Rusia të mërkurën, kur “u shpreh një protestë e fortë” në lidhje me vendimin e Oslos për të dëbuar 15 diplomatët rusë, tha në një deklaratë Ministria e Jashtme ruse.

“Ky hap armiqësor e përkeqësoi më tej situatën në marrëdhëniet dypalëshe, të cilat tashmë janë në një nivel kritikisht të ulët,” tha ministria.

Simenstad i ministrisë norvegjeze tha se vendimi rus konsiderohet “një akt hakmarrjeje”, duke shtuar se “të gjithë diplomatët tanë në Rusi kryejnë punë të zakonshme diplomatike. Autoritetet ruse e dinë mirë këtë.”

Fraksion.com