Rama: Vota kundër PS-së e ka katandisur Shkodrën në shëmbëlltyrën e paaftësisë

Kryeministri Edi Rama tha se pa votën për PS-në nuk do të ishin  kryer gjithë ato punë të vështira e reforma të cilat po japin pak e nga pak pakthyeshmërinë e një shteti të ri, që sot negocion me BE pas vitesh të ngarkuara me barrën e disa krizave marramendëse.

Në fjalën e tij në nisjen e fushatës së Partisë Socialiste për zgjedhjet vendore të 14 majit me sloganin “Kurrë më mbrapa, vetëm përpara”, Kryeministri Edi Rama u ndal në disa aspekte.

“Rritja, deri para disa vjetësh e paimagjinueshme, me galop e prurjeve të përvitshme të turistëve është vetëm paralajmërimi kuptimplotë i një të ardhmeje plot shpresë dhe prosperitet e cila e ka zanafillën dhe bazën e saj pikërisht tek ato 7 fitoret e Partisë Socialiste në 8 zgjedhjet e fundit; aty e ka bazën edhe transformimi si dita me natën i qyteteve tona në këto vite, edhe vijimi i transformimit historik të Tiranës, i cili pas grabitjes së mandatit tonë legjitim për bashkinë e Tiranës në vitin 2013 ndali, siç ndal zemra e njeriut nga një atak kardiak, sepse zgjedhjet kanë shumë më tepër rëndësi për një vend, për një qytet, për një komunitet, për një zgjedhës sesa ç’gabimisht mendojnë shumë prej zgjedhësve duke mos e ushtruar të drejtën e votës së tyre”, u shpreh Rama.

Kryeministri vuri në dukje se, “sa shumë punë nuk do të ishin bërë pa votën e Partisë Socialiste dhe sa shumë dëme do ishin shmangur pa votën për ata të tjerët”.

“Pa votën për Partinë Socialiste, sot asnjë nga qytetet që ne kemi qeverisur nuk do të ishte transformuar sikundër është transformuar. Mjafton të shikoni Shkodrën, ku vota kundër Partisë Socialiste nuk ka sjellë as edhe një nga ndryshimet pozitive që meriton ai djep kulture dhe historie në të cilin kanë lindur figurat themelore të botës shqiptare. Përkundrazi, vota në vijimësi kundër Partisë Socialiste në Shkodër ka krijuar një pashallëk mediokriteti dhe harbutllëku të një force politike e cila, duke drejtuar vetëm mbrapsht, e ka katandisur një prej kryeqendrave të vendit në shëmbëlltyrën e papastërtisë, paaftësisë, palëvizshmërisë”, deklaroi Rama.

“Kemi dyfishuar të ardhurat për frymë në Shqipëri. Ambicia ime është që brenda 2030 të kemi një pagë minimale të paktën 60 mijë lekë. Pavarësisht ngecjeve apo rrëzimeve gjatë rrugës, jo që këto nuk bëhen, por vendi kthehet përsëri prapa. Siç është kthyer sa herë që ata tjerët kanë marrë në duart e tyre duart e tij, Vota për të tjerët ka sjellë si rregull më shumë dëme sesa të mira. Dëme tejet serioze krejt të pariparueshme, apo dëme që kanë dashur vite të riparohen. Pa dyshim që edhe ne nuk e kemi bërë mirë çdo gjë, por asgjë me dëm serioz për Shqipërinë dhe shqiptarët nuk kemi bërë. Bilanci ynë është pozitiv në raport me të gjitha kontratat tona zgjedhore. Ne jemi fuqia e ndryshimit në këtë vend. Kudo që zgjedhësit të na e besojnë votën e tyre, ne bëjmë atë që tjerët nuk munden ta bëjnë”, tha Rama.

Ai theksoi këto deklarata nuk janë ekzagjerim. “Le të dalë dikush dhe të na tregojë një bashki të vetme në harkun e 30 viteve, ku vota për ata të tjerët ka sjellë ndryshim dhe përparim. Më besoni, kam kërkuar me mend jo një herë dhe nuk e gjej asnjë. Është i njëjti avaz si në Shkodër, kudo tjetër ku vota ka shkuar në drejtim tjetër. Shikoni Lezhën sot dhe imagjinojeni, larg qoftë, nesër Lezhën me po ata që sot janë ku e ku më keq nga çfarë ishin dje”, tha Rama.

Gjithashtu vuri në dukje Kryeministri gjatë fjalës së tij, ky aspekt i transformimit ka një rëndësi për vendin, se do të thotë jo vetëm ndryshim, por ndryshim i botës së jashtme ndaj nesh dhe kjo sjell më shumë vëmendje dhe interes, si një destinacion për të punuar, investuar dhe jetuar.

“Rritja e paimagjinueshme e turistëve është vetëm paralajmërimi kuptimplotë e një të ardhmeje me shpresë, aty e ka bazën transformimi si dita me natën. Zgjedhjet kanë shumë rëndësi për një vend, sesa çfarë gabimisht mendojnë shumë prej zgjedhësve duke mos dhënë votën, sa shumë punë nuk do ishin bërë pa votën e PS, dhe sa shumë dëme do ishin shmangur pa votën e PD”, tha Rama.

Fraksion.com