“Del paga e kundëradmiral Agastrës”, Rama: Ushtarakët do të paguhen si mesatarja e NATO-s, kushtet kanë ndryshuar…

Kryeministri Edi Rama deklaroi sot se, ushtarakët shqiptarë nuk janë më të fundit e rajonit për nivelin e pagave të tyre, përkundrazi ata kanë paga ndër më të lartat, të cilat do të vazhdojnë të rriten drejt mesatares së NATO-s.

Rama u shpreh se, “pagat e ushtrisë shqiptare ishin për një kohë të gjatë një arsye për t’u ndjerë keq për trupat e Forcave të Armatosura, por s’kishim asnjë rrugë tjetër përveçse të çonim përpara me këmbëngulje e durim ndryshimet e domosdoshme, pa të cilat pagat nuk mund të rriteshin siç duhej dhe siç e dëshironim të gjithë”.

Sipas tij, “tanimë kushtet kanë ndryshuar shumë”.

Kryeministri solli në vëmendje rastin e Kundëradmiral Adnan Agastra paga e të cilit në vitin 2022 ishte 141 mijë lekë ndërsa në maj 2023 shkon në 191 153 lekë. Ndërkohë në vitin 2024 paga e Kundëradmiralit shkon në 207 115 lekë.

Rama theksoi se, “pagat e reja, falë të cilave paga mesatare në Shqipëri thuajse dyfishohet duke arritur majën historike të 900 eurove në 2024, janë frut i një përpjekjeje të gjatë, këmbënguljeje e durimi të madh për reforma të vështira e masa të domosdoshme për ekonominë dhe për financat tona”.

Kryeministri theksoi se, pagat e reja janë frut i rritjes së të ardhurave falë rritjes së ekonomisë, tregtisë, investimeve publike e private, rritjes së prodhimit e të eksporteve, modernizimit të sistemit të mbledhjes së taksave përmes kompjuterizimit të transaksioneve në kohë reale.

“Ato janë frut i lehtësimit e rritjes së shpejtësisë së shërbimeve për biznesin falë digjitalizimit të tyre, forcimit të shtetit në tërësi dhe uljes së ndjeshme të korrupsionit në tatime e dogana, po mbi të gjitha, pagat e reja janë frut i punës sonë të përbashkët, të çdo shqiptari e shqiptareje, që në shtet a në privat, kontribuon për ekonominë shqiptare me punën e vet”, shtoi ai.

Fraksion.com