Papa Françesku lutet që rusët të shohin ‘dritën e Pashkëve’

I ulur për këtë fjalim pas një periudhe sëmundjeje të fundit, Françesku përsëriti lutjet e tij për paqen në Ukrainë dhe zona të tjera konflikti në mbarë botën.

Çfarë tha Papa

Papa denoncoi “terrin dhe errësirën nën të cilat gjendet e mbuluar shumë shpesh bota jonë “.

“Ndihmo popullin e dashur ukrainas në udhëtimin e tij drejt paqes dhe përhap dritën e Pashkëve te populli rus,” tha ai.

Françesku i kërkoi Zotit që “të ngushëllojë të plagosurit dhe të gjithë ata që kanë humbur të dashurit në luftë dhe të sigurojë që të burgosurit të kthehen të sigurtë në familjet e tyre; të hapë zemrat e të gjithë komunitetit ndërkombëtar që ajo të përpiqet t’i japë fund kësaj lufte dhe të gjitha grindjeve dhe gjakderdhje në botën tonë”.

Ai shprehu gjithashtu “shqetësimin e tij të thellë” për përkeqësimin e tensioneve midis Izraelit dhe palestinezëve.

Dhuna e fundit në Lindjen e Mesme “kërcënon klimën e besimit dhe respektit të ndërsjellë të nevojshme për rifillimin e dialogut midis izraelitëve dhe palestinezëve”, tha Françesku.

Papa e mbajti fjalimin e tij pas një meshe tradicionale përpara Bazilikës së Shën Pjetrit, ku morën pjesë dhjetëra mijëra besimtarë. Para meshës, Vatikani e mbuloi sheshin e Shën Pjetrit me rreth 35.000 lule – tulipanë, trëndafila etj – dhe lule të dhuruara nga Holanda, duke e kthyer sheshin në një “kopsht lulesh”.

Shtim i dobësisë fizike

Pashka është festa më e rëndësishme në kalendarin e Kishës Katolike Romake. Ajo përkujton vdekjen dhe ringjalljen e Jezu Krishtit, për të cilën Kisha thotë se ndodhi në këtë kohë të vitit.

Në fillim të këtij muaji, Françesku doli nga spitali i Romës pasi u shtrua në spital për tre netë me një infeksion bronkial. Ishte qëndrimi i dytë i Papës në spital që nga viti 2021 dhe ai ka vuajtur gjithnjë e më shumë nga problemet shëndetësore vitet e fundit. Ai tani përdor një karrige me rrota për shkak të dhimbjes së gjurit.

Papa Françesku ka marrë pjesë në ngjarje të ndryshme që nga dalja e tij nga spitali, duke përfshirë larjen e këmbëve të 12 të burgosurve të rinj të Enjten e Madhe.

Papa Françesku kthehet në publik për Vigjiljen e Pashkëve

Ai gjithashtu kryesoi meshën e vigjiljes – një ceremoni dy orë e gjysmë para 8000 vetëve – në bazilikën e Vatikanit të shtunën në mbrëmje. Gjatë kësaj meshe, ai kujtoi “erërat e akullta të luftës” dhe padrejtësitë e tjera.

Megjithatë, Françesku nuk mori pjesë në ceremoninë e lutjes vjetore të së Premtes së Madhe “Rruga e Kryqit” si masë paraprake për shkak të të ftohtit./DW