Xhaçka pret homologun e Emirateve të Bashkuara: Mbështetje për sigurinë kibernetike

Ministrja për Evropën dhe Punët e Jashtme, Olta Xhaçka, mirëpriti në takim ministrin për Punët e Jashtme dhe Bashkëpunim Ndërkombëtar të Emirateve të Bashkuara Arabe, Lartësia e Tij, Sheikh Abdullah bin Zayed Al Nahyan.

Ministrja Xhaçka vlerësoi ecurinë pozitive të marrëdhënieve mes dy vendeve dhe veçanërisht intensifikimin e bashkëpunimit në fushën ekonomike, përmes investimeve konkrete, marrëveshjen e arritur së fundmi me palën e emirateve për heqjen e vizave për shtetasit shqiptarë që vizitojnë EMA, duke filluar nga data 19 prill 2023, dhe mbështetjen e tyre në fushën e sigurisë kibernetike.

Në planin e bashkëpunimit shumëpalësh, ministrja Xhaçka dhe homologu emiratas u ndalën te kontributi që të dy vendet po japin gjatë shërbimit të tyre në Këshillin e Sigurimit të OKB-së, si dy shtete anëtare që bashkëpunojnë dhe ndajnë kryesisht interesa dhe vlerësime të ngjashme për shumicën e krizave që janë në agjendën e KS të OKB-së.

Në përfundim, kryediplomatët shkëmbyen mendime edhe për zhvillimet në rajonet respektive, duke theksuar se fryma e zgjidhjes së konflikteve me bisedime është kontribut thelbësor për paqen dhe sigurinë rajonale dhe më gjerë.

Fraksion.com