Autoritetet ruse: Arrestohet një grua për vrasjen e blogerit ushtarak rus në një shpërthim në Shën Petersburg

Vladlen Tatarsky ishte një nga blogerët ushtarakë më të shquar që kishte dhënë komente të vazhdueshëm mbi pushtimin rus të Ukrainës.

Zyrtarët rusë thonë se kanë arrestuar një të dyshuar për vdekjen e një blogeri ushtarak pro luftës, i vrarë në një shpërthim në një kafene në Shën Petersburg.

Daria Trepova, 26 vjeç, është arrestuar pas vdekjes së Vladlen Tatarsky në shpërthimin, i cili ndodhi në një kafene teksa ai po zhvillonte një bisedë të dielën, ka thënë Komiteti Hetues i Rusisë.

Rreth 30 persona u plagosën gjithashtu nga shpërthimi, ku 10 prej tyre thuhet se janë në gjendje kritike, sipas autoriteteve.

Raportet ruse të lajmeve thanë se bomba ishte fshehur në një bust të blogerit që e dyshuari ia kishte dhënë atij si dhuratë pak para shpërthimit.

Tatarsky, 40 vjeç, emri i vërtetë i të cilit ishte Maxim Fomin, kishte më shumë se 560,000 ndjekës në Telegram.

Ai ishte një nga blogerët më të shquar ushtarakë me ndikim, të cilët kanë dhënë një koment të vazhdueshëm mbi pushtimin rus të Ukrainës.

Tatarsky u vra ndërsa drejtonte një diskutim në një kafene në brigjet e lumit Neva në zemrën historike të Shën Petersburgut.

Në vërejtjet e regjistruara në video, një dëshmitar tha se një grua që u prezantua si Nastya bëri pyetje dhe shkëmbeu mendime me Tatarsky në ngjarje.

Dëshmitarja, Alisa Smotrova, citoi Nastya të thoshte se ajo kishte bërë një bust të blogerit, por rojet i kërkuan që ta linte te dera, duke dyshuar se mund të ishte një bombë.

Nastya dhe Tatarsky bënin shaka dhe qeshën. Më pas ajo shkoi te dera, kapi bustin dhe ia paraqiti Tatarskit.

Thuhet se ai e vendosi bustin në një tavolinë aty pranë dhe shpërthimi pasoi. Smotrova përshkroi njerëz që vraponin në panik, disa të lënduar nga xhamat e thyer dhe të mbuluar në gjak.

Një faqe interneti në Shën Petersburg tha se kafeneja dikur i përkiste Yevgeny Prigozhin, themeluesit të Grupit Wagner – ushtrisë private që po lufton për Rusinë në Ukrainë.

Një zyrtar kryesor rus drejtoi gishtin e fajit drejt Ukrainës, pa dhënë prova. Pretendimi u hodh poshtë nga Kievi.

Mykhailo Podolyak, një këshilltar presidencial ukrainas, fajësoi terrorizmin e brendshëm rus për shpërthimin.

“Merimangat po hanë njëra-tjetrën në një kavanoz”, shtoi ai.

“Në këtë pikë asgjë nuk është e sigurt”

Nëse Tatarsky do të shënjestrohej qëllimisht, do të ishte vrasja e dytë në tokën ruse e një figure të lidhur me luftën në Ukrainë.

Darya Dugina, vajza e një aleati të Vladimir Putinit, u vra gushtin e kaluar pasi një mjet i dyshuar shpërthyes shpërtheu në Toyota Land Cruiser me të cilin ajo po udhëtonte.

Tatarsky ishte në mesin e qindra të pranishmëve në një ceremoni luksoze të Kremlinit shtatorin e kaluar për të shpallur aneksimin nga Rusia të katër rajoneve pjesërisht të pushtuara të Ukrainës.

“Ne do t’i mposhtim të gjithë, do t’i vrasim të gjithë, do të grabisim këdo që kemi nevojë. Gjithçka do të jetë si të duam,” u shfaq ai në një videoklip me atë rast.

Analisti ushtarak Sean Bell tha për Sky News se “duket vërtet e pamundur” që ushtria ukrainase të ishte pas sulmit në Shën Petersburg pasi nuk ishte një objektiv ushtarak.

Blogerët rusë pro-luftës i kanë bërë nderime Tatarskit.

“Ai ishte në pikat më të nxehta të operacionit të posaçëm ushtarak dhe gjithmonë dilte i gjallë. Por lufta e gjeti në një kafene në Petersburg,” tha Semyon Pegov, i cili bën blog me emrin War Gonzo.

Fraksion.com