“Nuk më besuat”, Rama: Erdhi momenti t’i shpërndajmë pensionistëve taksën e eksportuesve të energjisë
Pensionistët do të marrin 5000 lekë si masë lehtësuese, pasi janë pjesa më e prekur nga lufta në Ukrainë. Kështu bën të ditur kryeministri Edi Rama, i cili sot më 1 prill ka publikuar vendimin e saporfirmosur të qeverisë për shpërblimin e tyre.
“Kur thosha qysh vjet në vjeshtë se do të vendosim taksë të jashtëzakonshme për eksportuesit e mëdhenj të energjisë dhe do t’ua shpërndajmë pensionistëve në prill, ata që ju e dini kush janë bërtisnin, ky është tatimi i jashtëzakonshëm komunist”,shkruan Rama.
Rama theksoi se, “e bëri BE-ja, e tha edhe këtu Ursula Von Der Leyen që po, kjo është diçka krejt e drejtë në këtë kohë krize dhe ata e mbyllën përkohësisht gojën. Pastaj e hapën para ca kohësh prapë, duke u qarë hallin pensionistëve se i mashtroi Edi Rama dhe se s’do merrnin asgjë, po kur e dëgjuan që kjo do të ndodhte siç ishte premtuar, u hodhën përpjetë se po shkelej Kodi Zgjedhor! Krejt e pavërtetë edhe kjo e kodit, si zakonisht kur ata hapin gojën xhanëm”.
Kreu i ekzekutivit tha se, taksa e jashtëzakonshme e eksportuesve të mëdhenj të energjisë, do të fillojë t‘u shpërndahet pensionistëve.
“Ja ku prilli erdhi dhe taksa e jashtëzakonshme mbi fitimet e rëna nga qielli i luftës në arkën e eksportuesve të mëdhenj të energjisë, do të fillojë t‘u shpërndahet pensionistëve, si pjesa më e prekur nga pesha e luftës, po edhe më dinjitozja në qëndresën e saj përballë vështirësive të kohërave”, tha Rama.
Ai tha se, “kjo është një tjetër masë lehtësuese për ta pas Pakos së Madhe, po nuk është e fundit, sepse ne nuk bëjmë dot sa duam për më të moshuarit, por nuk do të lemë kurrë pa bërë gjithçka mundemi”.
Fraksion.com
