Turqia miraton anëtarësimin e Finlandës në NATO

Votimi përmbush premtimin e presidentit turk Rexhep Tajip Erdogan për të lejuar Finlandën në aleancën e mbrojtjes. Kjo vjen pasi parlamenti i Hungarisë miratoi një projektligj të hënën që miraton anëtarësimin e Finlandës në NATO.

Votimi i parlamentit turk ishte pengesa e fundit e madhe me të cilën përballej oferta e Finlandës për t’u bashkuar me aleancën.

Sekretari i Përgjithshëm i NATO-s, Jens Stoltenberg përshëndeti vendimin e parlamentit turk të enjten.

“Unë mirëpres votën e Asamblesë së Madhe Kombëtare të #Turkiye për të përfunduar ratifikimin e pranimit të #Finlandës. Kjo do ta bëjë të gjithë familjen #NATO më të fortë dhe më të sigurt,” tha Stoltenberg në një postim në Twitter.
Presidenti finlandez Sauli Niinistö festoi lajmin, duke thënë se “Finlanda tani është gati për t’u bashkuar me NATO-n”. Niinistö shtoi se ai shpreson se edhe shteti fqinj Suedia do të jetë në gjendje të bashkohet sa më shpejt të jetë e mundur.

Kujtojmë se Finlanda njoftoi synimin e saj për t’u bashkuar me NATO-n në maj 2022, së bashku me Suedinë, pasi pushtimi rus i Ukrainës bëri që të dy vendet të braktisnin statusin e tyre të gjatë të jo-angazhimit.

Turqia e kishte ngecur procesin e miratimit pasi akuzoi të dy vendet për strehimin e “organizatave terroriste” kurde. Në fund të shkurtit, Stoltenberg tha se dukej se pengesa diplomatike kishte të bënte kryesisht me Suedinë.

Turqia nuk ka treguar ende nëse do ta miratojë anëtarësimin e Suedisë në NATO.

Kujtojmë gjithashtu se  NATO ka një politikë të dyerve të hapura, që do të thotë se çdo vend mund të ftohet të anëtarësohet nëse shpreh një interes, për sa kohë që është në gjendje dhe i gatshëm të mbajë parimet e traktatit themelues të bllokut. Megjithatë, sipas rregullave të pranimit, çdo shtet anëtar mund të vërë veton ndaj një vendi të ri për t’u anëtarësuar.

Turqia është një anëtare e fuqishme e NATO-s, me ushtrinë e dytë më të madhe të bllokut pas SHBA-së. Vendndodhja e saj në krahun juglindor të aleancës e bën atë një anëtar të rëndësishëm strategjik. Ajo vepron si një tampon midis Perëndimit dhe një grupi kombesh të Lindjes së Mesme me një histori jostabiliteti politik dhe ku shtetet perëndimore kanë interesa të mëdha. Fakti se ajo iu bashkua aleancës në vitin 1952, vetëm tre vjet pas themelimit të saj, shton ndikimin e saj.