“Amerikanët të ‘largohen menjëherë’ nga Rusia”, Shtëpia e Bardhë dënon arrestimin e gazetarit të WSJ. Jemi në “kontakt të drejtpërdrejtë” me Rusinë për këtë temë

Administrata e Biden është “thellësisht e shqetësuar” për raportet që reporteri i Wall Street Journal Evan Gershkovich është arrestuar në Rusi me akuza për spiunazh, tha të enjten sekretarja e shtypit e Shtëpisë së Bardhë, Karine Jean-Pierre.

“Mbrëmë, Zyrtarët e Shtëpisë së Bardhë dhe të Departamentit të Shtetit folën me punëdhënësin e zotit Gershkovich, Wall Street Journal. Administrata ka qenë në kontakt edhe me familjen e tij. Për më tepër, Departamenti i Shtetit ka qenë në kontakt të drejtpërdrejtë me qeverinë ruse për këtë çështje, duke përfshirë punën aktive për të siguruar aksesin konsullor ndaj zotit Gershkovich, “tha Jean-Pierre në një deklaratë.
“Synimi i qytetarëve amerikanë nga qeveria ruse është i papranueshëm. Ne dënojmë me shprehjet më të forta ndalimin e zotit Gershkovich”, shtoi ajo.

Sekretarja e shtypit vuri në dukje gjithashtu këshillën e Departamentit të Shtetit për amerikanët që të mos udhëtojnë në Rusi dhe shtoi se nëse ata aktualisht janë duke banuar ose udhëtuar atje, atëherë ata duhet të “largohen menjëherë”.