Ambasadori rus: Avionët amerikanë nuk kanë punë të jenë afër kufirit rus
Ambasadori rus në SHBA, Anatoli Antonov, tha të martën se Rusia nuk dëshiron “konfrontim” me SHBA-në, por “siç e shohim ne, avionët amerikanë nuk kanë punë të jenë afër kufirit rus”.
Duke folur me gazetarët pasi ai u thirr në Departamentin e Shtetit pas një incidenti që çoi në rrëzimin e një droni amerikan Reaper mbi Detin e Zi, Antonov pyeti: “A mund ta imagjinoni nëse një UAV i tillë do të shfaqej papritur afër Nju Jorkut ose San Franciskos? ”
“A mund ta imagjinoni reagimin e shtypit amerikan, Pentagonit, ndaj këtij droni? Çfarë lloj droni ishte? Mendoni për këtë përpara se të më thërrisni në Departamentin e Shtetit. Është një [dron] me shumë qëllime, me aftësi sulmi deri në një 1700 kilogramë ngarkesë shpërthyese”, tha ai. “Më tregoni se si do të reagonte ndonjë MM i çdo vendi ndaj kërcënimit të një rreziku të tillë që do të shfaqet përgjatë kufijve të tyre?”
Antonov tha se donte të tregonte “sa profesionistë ishin pilotët rusë në veprimet e tyre. Asnjë kontakt nuk u bë, as nuk u përdorën ndonjë armë nga avionët tanë luftarakë”.
“Mendoj se është më mirë të diskutojmë në Departamentin e Shtetit rrugët e bashkëpunimit dhe veprimit të ndërsjellë, por fatkeqësisht, komunikimi im me Departamentin e Shtetit së fundmi ka qenë vetëm për të adresuar protestat e tyre për veprimet e Federatës Ruse,” tha ai.
“Federata Ruse nuk është e interesuar për konfrontim. Pala ruse është e interesuar për marrëdhënie pragmatike me SHBA-në në interes të popullit rus dhe amerikan.”
Kujtojmë se droni Reaper po fluturonte mbi ujërat ndërkombëtare kur një nga dy avionët rusë fluturoi qëllimisht përpara dhe hodhi karburant mbi dronin pa pilot disa herë, sipas Komandës Evropiane të SHBA. Avioni më pas goditi helikën e dronit, duke nxitur forcat amerikane të rrëzonin dronin MQ-9 në ujërat ndërkombëtare.
Zëdhënësi i Pentagonit, gjeneralbrigade Patrick Ryder shtoi të martën se avioni rus fluturoi “në afërsi” të dronit për 30 deri në 40 minuta përpara se të përplasej pak pas orës 7 të mëngjesit me kohën e Evropës Qendrore.
Fraksion.com
