Departamenti i Drejtësisë: Ish-presidenti Trump mund të paditet për veprimet e tij të 6 janarit
Ish-presidenti Donald Trump mund të paditet nga policët e plagosur të Kapitolit dhe ligjvënësit demokratë për veprimet e tij gjatë sulmit ndaj Kapitolit më 6 janar të vitit 2021, tha të enjten Departamenti i Drejtësisë në argumentet e tij lidhur me një çështje gjyqësore federale mbi mbrojtjet ligjore të zotit Trump dhe kufijtë e pushtetit ekzekutiv.
Dokumenti i Departamentit të Drejtësisë thotë se megjithëse presidenti gëzon liri të gjerë ligjore për komunikimet me publikun për çështjet shqetësuese, “asnjë pjesë e përgjegjësive zyrtare të Presidentit nuk përfshin nxitjen e dhunës ndaj individëve. Sipas përkufizimit, një sjellje e tillë qartësisht del jashtë detyrave kushtetuese dhe statutore të Presidentit.”
Dokumenti u dorëzua në gjykatë nga avokatët e Divizionit Civil të Departamentit të Drejtësisë dhe nuk ka asnjë ndikim mbi një hetim penal të veçantë nga prokurori i posaçëm mbi përpjekjet e zotit Trump për të përmbysur fitoren e demokratit Joe Biden në zgjedhjet presidenciale të vitit 2020. Në fakt, avokatët theksuan se ata nuk po shprehin një qëndrim lidhur me përgjegjësinë e mundshme penale për veprimet e zotit Trump ose të dikujt tjetër.
Departamenti i Drejtësisë tha gjithashtu se nuk po shprehë asnjë pikëpamje për konkluzionet e një gjykatësi të një gjykate më të ulët se ata që paditën ish-presidentin Trump kanë pretenduar “në mënyrë të besueshme” se fjalimi i tij shkaktoi trazirat. Megjithatë, Departamenti i Drejtësisë tha se gjykata e apelit duhet të hedhë poshtë pretendimin e ish-presidentit Trump se ai ka imunitet nga paditë.
Departamenti i Drejtësisë paralajmëroi se “gjykata duhet të sigurohet që të mos miratojë rregulla që do të cenonin në mënyrë të panevojshme komunikimin legjitim presidencial” ose të ngarkonin një president me padi të pabaza.
“Gjatë ushtrimit të funksioneve të tyre tradicionale të komunikimit, presidentët trajtojnë në mënyrë rutinore çështje të diskutueshme që mund të nxisin reagime të forta. Presidentët ndonjëherë mund të përdorin retorikë të fortë. Dhe disa që dëgjojnë atë lloj retorike mund të reagojnë në mënyrë të tepruar apo me dhunë”, tha Departamenti i Drejtësisë.
Ish-presidenti Trump po apelon një vendim të një gjykatësi federal në Uashington, i cili vitin e kaluar kundërshtoi përpjekjet e tij për të hedhur poshtë paditë civile të paraqitura nga ligjvënësit demokratë dhe dy policë të Kapitolit. Gjykatësi federal Amit Mehta vendosi se fjalët e ish-presidentit Trump gjatë një tubimi përpara sulmit të dhunshëm ndaj Kapitolit ishin me gjasë “fjalë nxitëse që nuk mbrohen nga Amendamenti i Parë” i Kushtetutës amerikan, i cili mbron lirinë e shprehjes.
Paditë, të paraqitura nga ligjvënësi demokrat nga Kalifornia, Eric Swalwell dhe policët James Blassingame dhe Sidney Hemby, të cilave më vonë iu bashkuan anëtarë të tjerë demokratë të Dhomës së Përfaqësuesve, argumentojnë se zoti Trump dhe politikanë të tjerë bënë “akuza të rreme dhe nxitëse për mashtrim dhe manipulim (të zgjedhjeve), dhe në përgjigje direkte ndaj këtyre thirrjeve për dhunë në tubim, një turmë e dhunshme sulmoi Kapitolin amerikan.”
Paditë citojnë një ligj federal për të drejtat civile kundër frikësimit të zyrtarëve nga grupi Ku Klux Klan. Ata shpjegojnë në hollësi se si ish-presidenti Trump dhe të tjerët përhapën pretendime të pabaza për manipulim të zgjedhjeve, para dhe pas shpalljes së rezultatit të zgjedhjeve presidenciale të vitit 2020, të cilat, sipas tyre, ndihmuan në rritjen e zemërimit të mijëra njerëzve përpara se ata të sulmonin Kapitolin./VOA
Fraksion.com
