Shefi i NATO-s nuk ka ‘ndërmend’ të zgjasë mandatin

Jens Stoltenberg – zyrtari më i lartë civil i aleancës – pritet të japë dorëheqjen siç ishte planifikuar në fund të këtij viti.

Lideri afatgjatë i NATO-s, Jens Stoltenberg nuk ka plan të zgjasë mandatin e tij për herë të katërt dhe pret të zëvendësohet në tetor të këtij viti, tha të dielën aleanca ushtarake.

“Mandati i Sekretarit të Përgjithshëm Jens Stoltenberg është zgjatur tre herë dhe ai ka shërbyer prej pothuajse nëntë vjetësh”, tha zëdhënësja Oana Lungescu.

Mandati i Sekretarit të Përgjithshëm skadon në tetor të këtij viti dhe ai nuk ka ndërmend të kërkojë një vazhdim tjetër të mandatit të tij.

Deklarata vjen pas një raporti të gazetës gjermane Welt am Sonntag se shtetet anëtare donin që ai të qëndronte edhe më tej në post teksa Rusia po bën luftë në Ukrainë.

Ish-kryeministri norvegjez 63-vjeçar mori detyrën në selinë e NATO-s në Bruksel më 1 tetor 2014 dhe ka mbikëqyrur aleancën perëndimore përmes disa krizave ndërkombëtare.

Gjatë mandatit të tij në detyrë, personeli i fundit i NATO-s dhe forcat amerikane u larguan nga Afganistani në gusht të vitit 2021, pak para se kryeqyteti Kabul të binte në duart e talebanëve, të cilët ringjallën regjimin e tyre islamik.

Stoltenberg ka mbikëqyrur gjithashtu përgjigjen e NATO-s ndaj pushtimit rus të Ukrainës në shkurt të vitit 2022 dhe luftës në vazhdim.

Ai ka qenë një Sekretar i Përgjithshëm i respektuar dhe në veçanti një urë lidhëse midis aleatëve evropianë dhe Uashingtonit nën ish-presidentin amerikan Donald Trump, një kritik i shpeshtë i NATO-s.

Diplomatët nga disa aleatë të NATO-s kishin spekuluar se mandati i Stoltenberg mund të zgjatet edhe një herë deri në një samit vitin e ardhshëm për të shënuar 75 vjetorin e aleancës.

Por, pas një vizite në Uashington javën e kaluar, zyra e tij njoftoi se ai nuk do të kërkonte një zgjatje tjetër të mandatit.

Jens Stoltenberg  është  Sekretari i Përgjithshëm i NATO-s, i dytë më i gjatë në detyrë, i eklipsuar vetëm nga holandezi Joseph Luns, i cili e mbajti postin nga viti 1971 deri në 1984.

Fraksion.com