Skuadra shqiptare e kërkim-shpëtimit në rrënojat e tragjedisë në Malatya
Ekipet e kërkim-shpëtimit të dërguara nga Shqipëria, kanë nisur punën në terren në operacionet e kërkim-shpëtimit pas tërmetit shkatërrimtar në zonën e Turqisë Juglindore.
Në një postim në rrjetet sociale, Kryeministri Edi Rama përcolli momente nga puna e skuadrës shqiptare që vazhdon kërkimet për të mbijetuar në rrënojat e tërmetit.
“Skuadra shqiptare e kërkim-shpëtimit në rrënojat e tragjedisë në Malatya”, shkruan Rama.
Po ashtu edhe shefi i Shtabit të Përgjithshëm të FA – Gjeneral Brigade Arben Kingji deklaroi sot se ekipet shqiptare të kërkim-shpëtimit vijojnë operacionin në zonën e Turqisë Juglindore.
“Ekipet e përbëra nga personeli mjekësor dhe specialistë të kërkim-shpëtimit vijojnë operacionet në zonat e prekura nga tërmeti shkatërrimtar në Turqinë juglindore. Në emër të të gjithë personelit të Forcave të Armatosura shpreh ngushëllimet më të sinqerta për familjet që humbën të dashurit e tyre në këtë ngjarje tragjike në Turqi dhe Siri”, u shpreh Kingji.
