Helmetat e Bardha: Numri i të vdekurve pritet të rritet ndjeshëm në Sirinë veriperëndimore të kontrolluar nga rebelët

Qindra familje mbeten të bllokuara nën rrënojat e ndërtesave të shembura në Sirinë veriperëndimore pas tërmetit të fuqishëm të së hënës, sipas Helmetave të Bardha, të njohura zyrtarisht si Mbrojtja Civile e Sirisë.

Më shumë se 790 viktima janë konfirmuar të vdekur në pjesët e kontrolluara nga rebelët në veriperëndim të Sirisë dhe më shumë se 2,200 të plagosur, thanë Helmetat e Bardha në Twitter.

Megjithatë, “numrat pritet të rriten ndjeshëm sepse qindra familje janë ende nën rrënoja”, tha grupi.

Më shumë se 210 ndërtesa u shkatërruan nga tërmeti në veriperëndim të Sirisë, shtoi grupi.

Kujtojmë se  Siria, një vend që tashmë po vuan efektet e luftës civile, po përballet edhe me një shkatërrim të gjerë nga tërmeti. Më shumë se 1,500 viktima dhe 3,600 të plagosur janë raportuar në të gjithë vendin, sipas zyrtarëve.

Rreth 4 milionë njerëz në Sirinë veriore tashmë janë zhvendosur dhe mbështeten në mbështetjen humanitare si rezultat i luftës, tha më herët një zëdhënës i UNICEF-it. Ndër shqetësimet kryesore tani janë mungesa e aksesit në strehimore dhe ujë të pijshëm të sigurt mes kushteve të motit të ngrirë dhe rrezikut të sëmundjeve të tilla si përhapja e kolerës.

Fraksion.com