Zelensky akuzon Rusinë për ndalimin e më shumë se 100 anijeve dhe ndërprerjen e furnizimit global të ushqimit

Presidenti ukrainas Volodymyr Zelensky tha të shtunën se agresioni rus “shkatërron tregun e ushqimit” dhe akuzoi Moskën për ndalimin e më shumë se 100 anijeve me ushqim “për javë të tëra”.

Zelensky i bëri komentet në një fjalim para pjesëmarrësve në Konferencën e Ministrave të Bujqësisë në Berlin.

“Tani për tani, ndërsa diskutimet në këtë forum po vazhdojnë, më shumë se 100 anije që transportojnë ushqime janë të rreshtuara pranë Bosforit (Ngushtica në Turqi). Pse? Sepse ata duhet të inspektohen dhe përfaqësuesit rusë po e bllokojnë këtë inspektim”, tha Zelensky, duke folur në anglisht në konferencë. “Anijet janë të ndaluara për javë të tëra.”

“Kjo do të thotë çmime më të larta për Evropën. Për Azinë, kjo do të thotë një kërcënim në rritje i paqëndrueshmërisë sociale. Në Afrikë, për vende të tilla si Etiopia apo Sudani, kjo do të thotë tavolina bosh për mijëra e mijëra familje”, vazhdoi Zelensky.
Ai tha se “bota ka nevojë për më shumë vendosmëri dhe më shumë bashkëpunim për të ndaluar agresionin që shkatërron tregun ushqimor” dhe “për të ndaluar çdo shtet që bllokon detin dhe shkatërron zinxhirët e furnizimit me ushqim, për të sjellë para drejtësisë çdo tiran që përpiqet të bëjë urinë një instrument i ndikimit politik”.

Presidenti ukrainas tha se përpara pushtimit rus të Ukrainës në shkurt 2022, Ukraina “eksportoi gjashtë milionë e gjysmë ton ushqim çdo muaj”.

Por tani dërgesat janë përgjysmuar, për shkak të asaj që ai tha se ishte agresioni rus dhe veprimet për të bllokuar eksportet e ushqimit të Ukrainës.

Zelensky u bëri thirrje pjesëmarrësve të Konferencës së Ministrave të Bujqësisë që t’i bashkohen nismës “Gruri nga Ukraina”, si dhe të krijojnë qendra ushqimore në Afrikë. Ai i ftoi ata në Kiev “për të bërë marrëveshje konkrete”.

Fraksion.com