Qeveria britanike: Oligarkët rusë përdorën planin e vizave për investime për t’u vendosur në Mbretërinë e Bashkuar
Një plan britanik i vizave për të tërhequr investime u përdor nga 10 oligarkë rusë të vendosur nën sanksione për të marrë leje qëndrimi, sipas një rishikimi nga Zyra e Brendshme e Mbretërisë së Bashkuar të enjten.
Sekretarja e Brendshme Suella Braverman tha se një pakicë e vogël që kishte përdorur rrugën e vizave “ishte në rrezik të lartë për të pasur pasuri nëpërmjet korrupsionit ose aktiviteteve të tjera të paligjshme financiare dhe/ose përfshirjes në krim të rëndë dhe të organizuar”.
Braverman tha se 10 oligarkët rusë që përdorën skemën e vizave u sanksionuan pas pushtimit të Ukrainës.
Sekretari e bëri zbulimin në një deklaratë të enjten në fund të një rishikimi të shumëpritur në të ashtuquajturën skemë të “vizave të arta” për individët me vlerë të lartë neto.
Ajo tha gjithashtu se “hapja e MB ndaj biznesit global mbart rreziqe që aktorët keqdashës do të përfitojnë nga sistemet tona për të ndjekur qëllime korruptive dhe kriminale. Ne duhet të sigurojmë që kleptokracitë si Rusia të mos jenë në gjendje të veprojnë pa u ndëshkuar jashtë shtetit.”
Braverman tha se që nga pushtimi rus i Ukrainës në fund të shkurtit 2022, Mbretëria e Bashkuar ka vendosur sanksione ndaj 1200 individëve dhe 120 subjekteve të lidhura me shtetin rus dhe ka ngrirë 22 miliardë dollarë në asete ruse.
Kujtojmë se rruga e vizave të investitorëve të nivelit 1, e quajtur shpesh si “viza e artë”, u prezantua në vitin 2008 për të inkurajuar njerëzit e pasur jashtë Bashkimit Evropian për të investuar në MB. Ajo u mbyll vitin e kaluar.
Një rishikim i skemës së vizave u porosit në vitin 2018 nga sekretarja e atëhershme e Brendshme Amber Rudd pas helmimeve në Salisbury. Sulmi me agjent nervor ndaj ish-spiunit rus Sergei Skirpal dhe vajzës së tij rezultoi në vdekjen e një gruaje.
Në përgjigje të rishikimit, Braverman tha “Qeveria e ka të qartë se çdo rrugë e ardhshme e vizave për të lehtësuar migrimin e bazuar në investime nuk duhet të ofrojë hyrje vetëm në bazë të pasurisë personale të aplikantit.”
Fraksion.com
