Zgjedhja e kreut të ri të SPAK, Kim: Do të monitorojmë nga afër procesin e përzgjedhjes

Ambasadorja e SHBA-së në Tiranë, Yuri Kim deklaroi sot se “gjatë javës së fundit jemi takuar me çdo anëtar të Këshillit të Lartë të Prokurorisë (KLP) për të nënvizuar rëndësinë e zgjedhjes së një kreu të ri të SPAK”.

Në një postim në rrjetet sociale, Kim shkruan se kreu i ri i SPAK do të intensifikojë luftën kundër korrupsionit dhe krimit të organizuar, pa frikë apo favore.

Sipas saj, procesi i përzgjedhjes nuk duhet të ndikohet nga ata që kanë interes të kufizojnë ose manipulojnë hetimet.

“Ky është thelbi i reformës në drejtësi: drejtësia duhet të jetë e verbër ndaj pushtetit, prokurorët e gjyqtarët duhet t’i trajtojnë të gjithë si të barabartë para ligjit, institucionet duhet të jenë të pavarura. Reforma në drejtësi nuk është vetëm një kusht për anëtarësimin në BE; është kërkesë e drejtë e popullit shqiptar. SHBA do të qëndrojë gjithmonë me popullin e Shqipërisë”, deklaron diplomatja amerikane.

Ambasadorja nënvizon se “ne do të vazhdojmë të mbështesim me vendosmëri zbatimin e reformës në drejtësi. Kjo nuk do të ndryshojë. Do të monitorojmë nga afër procesin e përzgjedhjes për SPAK për t’u siguruar që reforma në drejtësi të ecë përpara”.

Kreu i ri i Strukturës së Posaçme Kundër Korrupsionit dhe Krimit të Organizuar (SPAK) do të zgjidhet më 16 dhjetor ndërsa në garë janë tre prokurorët Adnan Xholi, Altin Dumani dhe Edvin Kondili.

Fraksion.com