Shqipëria zyrtarisht anëtare e Mekanizmit të Mbrojtjes Civile të BE-së

Shqipëria u bë sot zyrtarisht një shtet pjesëmarrës në Mekanizmin e Mbrojtjes Civile të BE-së, sistemi i BE-së për menaxhimin e rrezikut nga fatkeqësitë.

Si një anëtare e plotë e Mekanizmit të Mbrojtjes Civile të BE-së, Shqipëria jo vetëm që do të jetë në gjendje të marrë mbështetje të menjëhershme, por gjithashtu mund të dërgojë ndihmë për vendet e goditura nga një fatkeqësi nëpërmjet Mekanizmit, duke çuar në reagim më të fortë dhe më të koordinuar ndaj krizave në Evropë dhe në pjesën tjetër të botës, thuhet në një njoftim të Komisionit Evropian.

Përpara se të anëtarësohej si një anëtare me të drejta të plota, Shqipëria ishte mbështetur tashmë nga Ekipet e Mbrojtjes Civile të BE-së pas tërmetit shkatërrues në nëntor 2019 dhe zjarreve në tre verat e fundit.

Komisioneri Janez Lenarcic ndodhet në Tiranë për të shënuar këtë rast. Së bashku me ministrin Peleshi, Komisioneri nënshkroi marrëveshjen për anëtarësimin e Shqipërisë në Mekanizëm.

Mekanizmi i Mbrojtjes Civile të BE-së synon të forcojë bashkëpunimin midis vendeve të BE-së dhe 8 shteteve pjesëmarrëse (Islanda, Norvegjia, Serbia, Maqedonia e Veriut, Mali i Zi, Turqia, Bosnja dhe Hercegovina dhe së fundmi Shqipëria) për mbrojtjen civile për të përmirësuar parandalimin, gatishmërinë dhe përgjigje ndaj fatkeqësive.

Kur një emergjencë mposht aftësitë e reagimit të një vendi në Evropë dhe më gjerë, ai mund të kërkojë ndihmë nëpërmjet Mekanizmit. Komisioni Evropian luan një rol kyç në koordinimin e reagimit ndaj fatkeqësive në mbarë botën.

Që nga fillimi i tij në 2001, Mekanizmi i Mbrojtjes Civile të BE-së i është përgjigjur më shumë se 600 kërkesave për ndihmë brenda dhe jashtë BE-së.

Një qasje e përbashkët ndihmon më tej të grumbullojë ekspertizën dhe kapacitetet e reaguesve të parë, shmang dyfishimin e përpjekjeve të ndihmës dhe siguron që ndihma të plotësojë nevojat e të prekurve. Grumbullimi i kapaciteteve dhe aftësive të mbrojtjes civile mundëson një përgjigje kolektive më të fortë dhe më koherente.

Mekanizmi gjithashtu ndihmon në koordinimin e aktiviteteve të gatishmërisë dhe parandalimit të fatkeqësive të autoriteteve kombëtare dhe kontribuon në shkëmbimin e praktikave më të mira.

Kjo lehtëson zhvillimin e vazhdueshëm të standardeve më të larta të përbashkëta duke u mundësuar ekipeve të kuptojnë më mirë qasjet e ndryshme dhe të punojnë në mënyrë të ndërsjellë kur godet një fatkeqësi.

Fraksion.com